کەمبۆدیا و تایلەند ئاگربەستیان ڕاگەیاند

ئاڤا نیوز

هەریەکە لە تایلەند و کەمبۆدیا، دوای پێنج ڕۆژ لە شەڕ و پێکدادانی بەردەوام لەسەر ئاگربەستی 'بێ مەرج' ڕێککەوتن.

چیرۆکی سەرەکی: ڕۆژی دووشەممە 2025-07-28، دوای پێنج  ڕۆژ شەڕ و پێکدادان لە نێوان هەردوو وڵاتی تایلەند و کەمبۆدیا، لەسەر داوای دۆناڵد ترەمپ، سەرۆکی ئەمریکا و بە نێوەندگیری مالیزیا هەردوو وڵات لەسەر ئاگربەستێکی بێ مەرج ڕێککەوتن.

لێدوانی فەرمی: ئەنوەر ئیبراهیم، سەرۆکوەزیرانی مالیزیا کە ناوبژیوانی دانوستانەکانی نێوان هەردوولا بووە ڕایگەیاند، تایلەند و کەمبۆدیا ڕێککەوتوون لەسەر ئاگربەستێکی "بێ مەرج" و لە شەوی دووشەممەوە دەستپێدەکات.

لەلایەکی دیکەوە: هون مانێت، سەرۆکوەزیرانی کەمبۆدیا ڕایگەیاند، لەگەڵ تایلەند ئاگربەستمان راگەیاندووە، ئەمەش چانسێکی گەورەیە بۆ گەڕانەوە بۆ دۆخی ئاسایی پەیوەندییەکانمان دوای پێنج ڕۆژ شەڕی بەردەوام.

زانیاریی زیاتر: ناکۆکییەکانی هەردوو وڵات لەسەر ئەوە بوو تایلەند، کەمبۆدیای بەوە تۆمەتبار دەکرد کە لە ناوچە جێناکۆکانی سەر سنووردا مینی چاندووە و لە ماوەی پێنج ڕۆژی شەڕی هەردوو وڵات دا 200 هەزار کەس ئاوارەبوون و نزیکەی 35 کەس کە پێکدادانەکان کوژران و دەیانی دیکەش برینداربوون.