وەزارەتی کارەبا گفتوگۆ لەبارەی چارەسەری کێشەی کەمی کارەبا لە هەندێک ناوچە دەکات

ئاڤا نیوز

وەزارەتی کارەبا گفتوگۆی چارەسەری کێشەی کەمی کارەبا هەندێک ناوچەی هەرێمی کوردستان دەکات، لە نێویشیاندا ئیدارەی سەربەخۆی سۆران کە بەگوێرەی پێویست کارەبای نیشتمانیان بۆ دابین ناکرێت.

 

چیرۆکی سەرەکی: ماوەی چەند ڕۆژێکە گرفتی پێدانی کارەبای نیشتمانی لە سنووری ئیدارەی سەربەخۆی سۆران دروستبووە، پێدانی کاتژمێرەکانی کارەبا بەشێوەیەکی بەرچاو کەمیکردووە.

 

لێدوانی فەرمی: ئەردەلان شوکری، بەڕێوەبەری گشتی دیوانی وەزارەتی کارەبا بە ئاڤای گوت، "وەزارەتی کارەبا لەسەر ئاستی باڵا گفتوگۆی چارەسەرکردنی کێشەی کەمی پێدانی کارەبای نیشتمانی بەشێکی ناوچەکان دەکات، ئەو ناوچانەی تاوەکو ئێستا پڕۆژەی ڕووناکیان پێنەگەیشتووە."

 

سەبارەت بە کارەبای سۆران گوتی، "لەڕێگەی لیژنەیەکەوە لە کۆنتڕۆڵی کارەبا، پشکی سۆران لە هەولێر جیادەکرێتەوە و بەشی خۆی بۆ دابین دەکرێت."