ترەمپ: خەڵکی غەززە پێیان خۆشە لە غەززە بچنە دەرەوە

ئاڤا نیوز

 

سەرۆکی ئەمریکا لەبارەی دۆخی غەززە دەڵێت، ئەگەر هەڵبژاردەیەکی باشتر بۆ خەڵکی فەلەستین هەبێت ئەوا ئەوان دەیانەوێت کەرتەکە جێبهێڵن.

 

وێنە گەورەکە: دۆناڵد ترەمپ، سەرۆکی ئەمریکا لە زۆرینەی چاوپێکەوتنەکانیدا پلانی ڕاگواستنی فەلەستینییەکانی بۆ وڵاتانی دراوسێی وەک ئوردن و میسر خستووەتەڕوو، بەڵام پێشنیازەکە لەلایەن ئەو وڵاتانەوە ڕەتکراوەتەوە. ئێستا دووبارە ترەمپ گەڕاوەتەوە سەر بیرۆکەی گواستنەوەی دانیشتووانی غەززە بۆ دەرەوەی کەرتەکە.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، ''زۆرێک لە دانیشتوانی غەززە ئامادە دەبن کەرتی بەجێبهێڵن ئەگەر بژاردەیان پێ بدرێت، هاوکات دەشڵێت، غەززە پێویستی بە خۆراک هەیە، ئیسرائیل دەتوانێت کاری باش بکات سەبارەت بە ناوەندەکانی خۆراک لە غەززە''. وتیشی، "هەندێک کەس بیرۆکەکەیان بەدڵ بوو، هەندێکیان نەیانویست، دەبێت بزانین چی ڕوودەدات".

 

ترەمپ ئاماژەی بەوەدا کە ئەو وێنانەی لە غەززە هەن ترسناکن و جەختی لەسەر پێویستی گەیاندنی خۆراک بۆ منداڵانی کەرتی غەززە کردەوە، ئەمەش لەکاتێکدایە ترەمپ بڕیاری دامەزراندی ناوەندی خۆراکی لە کەرتی غەززە داوە.