ترەمپ 10 ڕۆژ مۆڵەت بە پووتین دەدات؛ دەبێت بە ئاگربەست ڕازی بێت

ئاڤا نیوز

جارێکی دیکە سەرۆکی ئەمریکا دووپاتیکردەوە، "لە ڕۆژی سێشەممەوە 10 ڕۆژی دیکە مۆڵەت دەدەمە ڕووسیا بۆ گەیشتن بە ڕێککەوتنی ئاگربەست لەگەڵ ئۆکراینا".

وێنەگەورەکە: ڕۆژی سێشەممە 29-7-2025، دۆناڵد ترەمپ، سەرۆکی ئەمریکا لە کاتی گەڕانەوەی لە سکۆتلەندا بۆ واشنتن بۆ ڕۆژنامەنووسان قسەی کرد و وادەیەکی دیکەی بۆ پووتین دانا بۆ ڕازیبوون بە ئاشتی و ڕایگەیاند، پووتین دەبێت لە ماوەی 10 ڕۆژدا ڕازی بێت بە ئاگربەست لە ئۆکراینا.

لێدوانی فەرمی: ترەمپ لە وەڵامی ڕۆژنامەنووسێک وتی، '' 10 ڕۆژی دیکە مۆڵەت بە پووتین دەدەم بۆ ڕازیبوون بە ئاشتی و وادەکە لە سێشەممەوە دەستپێدەکات''.

باکگراوند: دوو هەفتە لەمەوبەر ترەمپ ڕایگەیاندبوو، ڤلادیمێر پووتین، سەرۆکی ڕووسیا 50 ڕۆژی لەبەردەمدایە بۆ ئەوەی کۆتایی بە شەڕی ئۆکراینا  بهێنێت، ئەگەر ڕێککەوتن نەکات، ئەوا پێناسی گومرگی زیاتریان بەسەردا دەسەپێنن.