ئاگرێکی گەورە لە هەولێر کەوتەوە و 10 تیم سەرقاڵی کۆنترۆڵکردنی ئاگرەکەن

ئاڤا نیوز

دوای نیوەڕۆی ئەمڕۆ ئاگرێکی گەورە لە کۆگایەکی شاری هەولێر کەوتەوە و 10 تیم سەرقاڵی کۆنترۆڵکردنی ئاگرەکەن، بەهۆی ئاگرەکەوە زیانی زۆری ماددی بەر کۆگاکە کەوتووە.

لێدوانی فەرمی: موقەدەم شاخەوان سەعید، وتەبێژی بەرگریی شارستانیی هەولێر بە ئاڤا میدیای ڕاگەیاند، 10 تیمی بەرگری شارستانیی سەرقاڵی کۆنترۆڵکردنی ئاگرەکەن و هیچ زیانی گیانی نەبووە، هۆکاری ئاگرکەوتنەوەکەش تا ئێستا دیار نیە.

ئەو گۆگایەی ئاگری لێکەوتووەتەوە، کۆگای بەڕێوەبەرایەتیی ئاوی هەولێرە و ماددەی پلاستیک و بۆری تێدا بووە، ئەمەش بووەتە هۆی تەشنەکردنی ئاگرەکە.

زانیاریی پەیامنێر: بەپێی زانیارییەکانی پەیامنێری ئاڤا میدیاکە لە نزیک ڕووداوەکە ئامادەبوو، ئاگرەکە سەرەتا لە دەرەوەی کۆگاکە کەوتووەتەوە، دواتر گەیشتووەتە ناو کارگەکە و تەشەنەی کردووە.

 پەیامنێری ئاڤا میدیا باس لەوەش دەکات، ئەگەرچی هەندێك بەربەست لەبەردەم تیمەکان هەبوون، بەڵام تیمەکانی ئاگرکوژێنەوە بەردەوام بوون لە شکاندنی بەربەستەکان، بۆئەوەی کۆنترۆڵی ئاگرەکە بکەن.