کاروانێکی نوێی خێزانە عێراقییەکان لە کەمپی هۆلی سووریاوە گەڕێنرانەوە

ئاڤا نیوز

لە چوارچێوەی پرۆسەی گەڕاندنەوەی خێزان و منداڵانی چەکدارانی داعش کە بە ڕەچەڵەک عێراقین،  کاروانێکی نوێی ئەو خێزانانە لە کەمپی هۆلی سووریاوە بەرەو عێراق بەڕێکران.

وێنە گەورەکە: کەمپی هۆل دەکەوێتە پارێزگای حەسەکە لە ڕۆژئاوای کوردستان و ئیدارەی خۆبەڕێوەبەری سووریا (خۆسەر) سەرپەرشتی دەکات، نزیکەی 43 هەزار چەکداری پێشوو و ژن و منداڵی ئەندامانی داعش لەو کەمپە کۆکراوەتەوە، 15 هەزاریان عێراقین، بەغداش جەخت لە گەڕانەوەی هەموویان دەکاتەوە.

ڕاگەیێنراوی فەرمی: ئیدارەی خۆبەڕێوەبەری سووریا (خۆسەر)، لە لەبەیاننامەیەکدا ڕایگەیاند: لەچوارچێوەی هەماهەنگیی هاوبەشدا لەنێوان حکومەتی عێراق، هێزەکانی هاوپەیمانیی نێودەوڵەتی و ئیدارەی خۆسەر، 233 خێزانی دیکەی عێراقی، کە پێکهاتبوو لە  812 کەس، لە کەمپی هۆلەوە بۆ عێراق بەڕێکران.

زانیاری زیاتر: بەیاننامەکە ئاماژەی بەوەکرد، ئەمە بیست و هەشتەمین کاروانی ئەو عێراقیانەیە کە کەمپی هۆلیان جێهێشتووە و ڕوویان لە کەمپی جەدعەی نێو خاکی عێراق کردووە.

ئەوەی پێویستە بیزانیت: بەگوێرەی ئامارەکانی وەزارەتی کۆچ و کۆچبەرانی عێراق، زیاتر لە 15 هەزار کەس لە ژن و منداڵی چەکدارانی داعش کە بە ڕەچەڵەک عێراقین  لە ماوەی چوار ساڵی ڕابردوو لە کەمپی هۆلەوە گواستراونەتەوە عێراق و پرۆسەکەش بەردەوامە.