نەجەف: پلانی ئەمنیی تایبەت بە چلەی ئیمام حوسێن چووە بواری جێبەجێکردنەوە

ئاڤا نیوز

فەرماندەی پۆلیسی پارێزگای نەجەف، پلانی ئەمنیی تایبەت بە ڕێوڕەسمی چلەی ئیمام حوسێنی ڕاگەیاند و دەڵێت:" پلانەکە لە ئەمڕۆ هەینییەوە دەچێتە بواری جیبەجێکردنەوە".

وێنە گەورەکە:  ساڵانە بەبۆنەی چلەی "شەهیدکردنی" ئیمام حوسێن ملیۆنان زیارەتکاری عێراقی و بیانی سەردانی مەزارگەی ئیمام حوسێن لە شاری کەربەلا و مەزارگەی ئیمامی عەلی لە شاری نەجەف دەکەن، بۆ ئەو مەبەستەش سەرجەم دامودەزگا ئەمنی و خزمەتگوزارییەکانی عێراق بە تەواوی دەکەونە ئامادەباشییەوە.

لێدوانی فەرمی: عەقید موفید تاهیر، بەڕێوەبەری بەشی پەیوەندییەکان و ڕاگەیاندن لە فەرماندەی پۆلیسی نەجەف، ڕایگەیاند: بەپێی ئەو پلانەی داڕێژراوە و بەمەبەستی ئاسانکاری بۆ تێپەڕبوونی زیارەتکاران و گەیشتنیان بە مەزارگە پیرۆزەکان لە پێش هەمووشیانەوە مەزارگەی ئیمام عەلی،  پارێزگای نەجەف بۆ شەش ڕێگای سەرەکی و چەندین ڕێگای لاوەکیی دابەش دەکرێت.

زانیاریی زیاتر: عەقید موفید تاهیر ئاماژەی بەوەشکرد، چەندین وەزارەت و دەستە بەشداری لەپلانەکە دەکەن و چەندین ژووری ئۆپەراسیۆنیش لەخۆدەگرێت کە 24 کاتژمێر بۆ پێشکەشکردنی خزمەتگوزاری بە زیارەتکاران کار دەکەن.

ئەوەی پێویستە بیزانیت: چلەی ماتەمینی ئیمامی حوسێن دەکەوێتە ڕۆژی 20ـی سەفەری 1447ـی کۆچی، کە بۆ ئەمساڵ بەپێی هەندێک لێکدانەوەی فەلەکی ڕێککەوتی 12 یان 14ـی ئاب دەبێت.