لەبارەی دۆخی بارمتەکانی ئیسرائیل ئەنجوومەنی ئاسایشی نێودەوڵەتی کۆدەبێتەوە

ئاڤا نیوز

بڕیار وایە سبەی سێشەممە ئەنجوومەنی ئاسایشی نێودەوڵەتی دانیشتنێکی بەپەلە سەبارەت بە بارمتەکانی ئیسرائیل لە غەززە ئەنجام بدات.

ببینە و ببیستە: بڵاوبوونەوەی گرتەیەکی ڤیدیۆیی لەلایەن بزووتنەوەی حەماس، کاردانەوەی بەرفراوانی لێکەوتووەتەوە، تێیدا چەند بارمتەیەکی ئیسرائیلی لە غەززە دەردەکەون کە بەهۆی برسێتییەوە زۆر لاواز و بێهێز بوونە، بەهۆیەوە شۆکێکی لە ئیسرائیل دروست کرد و ناڕەزایەتی گەورەی بەدوای خۆیدا هێنا و بنیامین ناتانیاهۆ، سەرۆکوەزیرانی ئیسرائیلیان بە سیاسەتی هەڵە و نامرۆڤانە تۆمەتبار کرد. 

لێدوانی فەرمی: دانی دانۆن، باڵیۆزی ئیسرائیل لە نەتەوە یەکگرتووەکان ڕایگەیاند کە ئەنجوومەنی ئاسایشی نێودەوڵەتی دانیشتنێکی بەپەلە دەکات بۆ تاوتوێکردنی بارودۆخی بارمتەکان لە غەززە، ڕاگەیاند: "ڕۆژی سێشەممە لە دانیشتنێکی بەپەلە و تایبەتدا  ئەنجوومەنی ئاسایشی نێودەوڵەتی سەبارەت بە بارودۆخی خراپی مرۆیی بارمتەکان لە غەززە کۆدەبێتەوە".

ئەوەی پێویستە بیزانیت: لە گرتە ڤیدیۆییەکەدا، سەربازێکی ئیسرائیلی بە ناوی "ئێڤیاتار داود" دەردەکەوێت کە بەهۆی کەمیی خۆراکەوە کێشی دابەزیوە و دەڵێت: "نەتانیاهۆ وازی لێهێناین، چەند ڕۆژێکە هیچم نەخواردووە. خۆراکی ئێمە لە نیسک و فاسۆلیا پێکهاتووە." حەماس ڕایگەیاندووە: "ئەوەی ئێمە بیخۆین، ئەوانیش دەیخۆن". حکومەتی ئیسرائیلی بە هەڵبژاردنی سیاسەتی برسیکردن تۆمەتبار کردووە.