زانیاریی لەبارەی زیادکردنی مووچەی خاوەنپێداویستییە تایبەتەکانی کوردستان دەدرێتە بەغدا

ئاڤا نیوز

وەزارەتی کار و کاروباری کۆمەڵایەتی هەرێمی کوردستان، لیستی ناو و تێچووی مووچەی نزیکەی 90 هەزار خانەوەنپێداویستی تایبەتی ڕادەستی بەغدا کردووە، بۆ ئەوەی بەشێکیان تۆماربکرێن و تێکڕا مووچەیان هاوتای بەغدا بکرێت.

وێنە گەورەکە: ماوەی 11  ساڵە 13 هەزار و 120 خاوەن پێداویستی تایبەت لیژنەیان بۆ کراوە و چاوەڕوانن مووچەیان بۆ ببڕێتەوە، وەزارەتی کار لەگەڵ ئەو 76 هەزار کەسەی دیکە کردوویەتی بە یەک پاکێج، بۆ ئەوەی هەم مووچەیان بۆ ببڕێتەوە هەم هاوتای عێراق بکرێت، بەمەش کەمترین مووچە دەبێتە 250 هەزار دینار.

لێدوانی فەرمی: کوێستان محەممەد، وەزیری کار و کاروباری کۆمەڵایەتی بە ئاڤای ڕاگەیاند، "چەند ڕۆژێک لەمەوبەر نووسراوێکمان بەدەست گەیشت داوای ناو و تێچووی ئەو 13 هەزار کەسەیان کردووە کە پشکنینیان بۆ کراوە و مووچەیان بۆ نەبڕاوە، لەگەڵ ئەوانەی داوای هاوتاکردنی مووچەکانیان بکرێت، ئێمەش زانیارییەکانمان ڕادەستکردوون."

لەلایەکی دیکەوە: وەزارەتی کاری هەرێمی کوردستان، کار لەسەر دەستپێکردنەوەی پارەی تۆڕی پاراستنی خێزان دەکات، کە لە مانگی نۆی ساڵی 2015 وەستاوە، لە عێراق دەدرێت بە نۆ ملیۆن خێزان و لەهەرێمی کوردستان 205 خێزان سوودمەند دەبن، لەئەگەری دەستپێکردنەوەی پرۆسەکە.