قوماری ئەلیکترۆنی دەیان خێزان لە هەرێمی کوردستان هەڵدەوەشێنێتەوە

ئاڤا نیوز

قوماری ئەلیکترۆنی و پێشبینی یارییەکانی تۆپی پێ و چەند یارییەکی دیکە، بوونەتە هەڕەشەیەکی جددی لەسەر گەنجانی هەرێمی کوردستان و ڕۆژانە دەیان کەس بەهۆیەوە مایەپووج دەبن.

وێنە گەورەکە: گەنجانی هەرێمی کوردستان لەڕێگەی بەرنامە و ماڵپەڕە تایبەتەکانەوە، ڕوویان کردووەتە قوماری ئەلیکترۆنی و پێشبینیی یارییەکانی تۆپی پێ و چەند یارییەکی دیکە، بەمەش ڕۆژانە دەیان هەزار دۆلار لە هەرێمی کوردستان دەچێتە دەرەوە، جگە لەوەش قوماری ئەلیکترۆنی بووەتە سەرچاوەی کێشەی کۆمەڵایەتی و چەندین خێزانی هەڵوەشاندووەتەوە.

ئەوەی پێویستە بیزانیت: بۆ گەیشتن بە قوماری ئەلیکترۆنی، گەنجەکان بەرنامەی ڤی پی ئێن بەکاردەهێنن، لۆکەیشن و ناونیشانی وڵاتەکانیان دەگۆڕن، دواتر پارەکانیان لەڕێگەی دراوە ئەلیکترۆنییەکانەوە دەکەن بە USDT، لە قومار و پێشبینییەکاندا بەکاری دەهێنن، ئەو گەنجانە لە یەک کاتدا لە دراوە ئەلیکترۆنییەکان، قومار و پێشبینیی یارییەکانیشدا زەرەرمەند دەبن.

لێدوانی فەرمی: سەربەست نەجمەددین، شارەزای ئاسایشی ئەلیکترۆنی بە ئاڤا میدیای ڕاگەیاند: گەنجەکان پێشبینیی یارییەکانی تۆپی پێ لە پێنج خولە گەورەکەی سەر ئاستی ئەوروپا دەکەن، بەشێکی دیکەشیان لەسەر ئەو بەرنامانە قوماری ئەلیکترۆنی دەکەن کە تایبەتن بە پۆکەر و یارییەکانی دیکەی لەسەر موبایلەکانیان دادەبەزێندرێن.

- لە هەرێمی کوردستان ماڵپەڕی تایبەت بە قوماری ئەلیکترۆنی دروستکراوە و خەڵکێکی زۆر قوماری تێدا دەکات، ماڵپەڕەکە بە ئاسانی کار دەکات و هیچ لێپێچینەوەیەکی لەگەڵدا ناکرێت، تەنانەت لە چەند ماڵپەڕێکی دیکەی کوردستان ڕیکلام کارەکانی دەکات و ماڵپەرەکەش جگە لە پشێبینیکردن و قومار، هیچ خزمەتگوزارییەکی دیکە بە سەردانیکەرانی نادات.

- بە وتەی ئەو شارەزایەی ئاسایشی ئەلیکترۆنی، ئەو قومارە لەنێو گەنجاندا باوە و دەستاودەستی پێوە دەکرێت، ڕۆژانە خەڵک بە ناشارەزاییەوە دەڕۆنە ناویەوە و تووشی زیانی زۆر دەبنەوە.

لەلایەکی دیکەوە: د. حەسەن موفتی، سەرۆکی ئەنجوومەنی باڵای فەتوای هەرێمی کوردستان بە ئاڤا میدیای ڕاگەیاند: ئەم کارە حەرامە و بەپێی دەقەکانی قورئان ڕێگەپێدراو نییە، قومار بە خەسارەت بۆ سەر ماڵ و موڵک هەژمار دەکرێت و سەرچاوەی بەشێکی زۆری کێشەکانی کۆمەڵگەیە، قومار بە هەڕەشە بۆ سەر شیرازەی خێزان دادەنرێت، چەندین خێزانی هەڵوەشاندووەتەوە. جگە لە بەهەدەردانی سەروەت و سامان، کەسانێک قوماریان لەسەر ژن و منداڵەکانیان کردووە، ئەمەش گرفتی گەورە لە کۆمەڵگەدا دروست دەکات و کارێکی قبووڵ نەکراوە.

پەیوەست بەم بابەتە: توانا بورهان جاف، پارێزەری ڕاوێژکار بە ئاڤا میدیای گوت: دیاردەی قومار لەنێو گەنجاندا زۆر بەربڵاوە و هەرزەکاران بڕە پارەیەکی زۆر لەو ڕێگەیەوە دەدۆڕێنن، بۆیە بەپێی ماددەی 389 لە یاسای سزادانی عێراقی، ئەم جۆرە کارانە بە تاوان هەژمار دەکرێت، ئەنجامدەر و ڕێکخەر، بەڕێوەبەری ئەم جۆرە کارانە سزا دەدرێن و سزاکەش بەندکردنە. ئەم جۆرە یارییانە وایکردووە گەنجان دزی لە خەڵک و خانەوادەی خۆشیان بکەن، جگە لە هەڕەشە و فێڵکردن، فێری کاری گەیاندنی ماددەی هۆشبەریش بوون، تەنانەت لە تاوانە ئابڕووبەرەکانیشدا بەشدار دەبن.