لافاوێکی بەهێز لە چین؛ 10 کەس گیانیان لەدەستدا و دەیانی دیکە بێسەروشوێنن

ئاڤا نیوز

بەپێی میدیاکانی دەوڵەتی چین، بەهۆی لافاوێکی خێراوە لە پارێزگای گانسو لە باکووری ڕۆژئاوای ئەو وڵاتە، لانیکەم 10 کەس گیانیان لەدەستداوە و 33 کەسی دیکەش بێسەروشوێن بوون.

چیرۆکی سەرەکی: بەهۆی بارانبارینێکی بەخوڕ کە لە دوێنێوە پارێزگای گانسوی لە چین گرتووەتەوە، لافاو دروست بووە و بووەتە هۆی زیانێکی زۆری گیانی و ماددی.

زانیاریی بەدەستهاتوو: کەناڵی فەرمی "CCtv"ـی چین بڵاویکردەوە کە شی جینپینگ، سەرۆکی چین، فەرمانی بە دەستپێکردنی ئۆپەراسیۆنێکی فریاگوزاریی بەپەلە کردووە و جەختی کردووەتەوە لەسەر "بەکارھێنانی ھەموو توانایەک" بۆ دۆزینەوە و ڕزگارکردنی کەسە بێسەروشوێنەکان.

زانیاریی زیاتر: ئەم ڕووداوە لە کاتێکدایە کە لە ماوەی چەند هەفتەی ڕابردوودا شەپۆلێکی بارانبارینی پێوانەیی باکوور و باشووری چینی گرتووەتەوە. زانایانی کەشناسی ئەم دیاردەیە بە کەشوهەوایەکی تووند وەسف دەکەن و بە گۆڕانی کەشوهەواوەی دەبەستنەوە.

ژمارەکان وادەڵێن: لە کۆتایی مانگی تەممووزەوە، بەهۆی لافاو و بارانی بەخوڕ لە باکووری چین، لانیکەم 60 کەسی دیکە گیانیان لەدەستداوە.