ترەمپ هێزی فیدراڵی لە پایتەختی ئەمریکا بڵاو دەکاتەوە

ئاڤا نیوز

دۆناڵد ترەمپ فەرمانی کردووە بە زیادکردنی هێزەکانی یاساپارێزی فیدراڵی لە شەقامەکانی واشنتۆن دی سی، لە هەنگاوێکدا کە ئامانج لێی ڕووبەڕووبوونەوەی تاوانە لە پایتەختی ئەمریکا.

چیرۆکی سەرەکی: لە ڕۆژی پێنج شەممەوە ئیدارەی ترەمپ دەستیانکردووە بە بڵاوکردنەوەی هێزی فیدراڵی لە واشنتن دی سی و بۆ ماوەی حەوت ڕۆژ ئۆپراسیۆنەکانیان بەردەوام دەبێت.

لێدوانی فەرمی: کارۆلاین لێڤیت، وتەبێژی کۆشکی سپی ڕایگەیاند، واشنتن دی سی شارێکی سەرسوڕهێنەرە، بەڵام ماوەیەکی زۆرە ڕێژەی تووندوتیژی تیایدا زیادیکردووە، سەرۆک ترەمپ فەرمانیکردووە بە زیادکردنی هێزەکانی یاساپارێزی فیدراڵی بۆ پاراستنی هاووڵاتییانی بێتاوان.

ئەوەی پێویستە بیزانیت: سەرەڕای ئەم هەنگاوەی ئیدارەی ترەمپ، ئامارە فەرمییەکانی پۆلیسی واشنتن دی سی نیشانی دەدەن کە تاوانی تووندوتیژی لە ساڵی 2024 گەیشتووەتە نزمترین ئاستی لە ماوەی 30 ساڵدا و لە ساڵی 2025شدا بە ڕێژەی 26% کەمی کردووە.