بەرپرسێکی ئیسرائیل وردەکاری پلانی وڵاتەکەی بۆ داگیرکردنی غەززە ئاشکرا دەکات

ئاڤا نیوز

 

دوای بڕیارەکەی ئیسرائیل بۆ داگیرکردنی غەززە، بەرپرسێکی ئیسرائیل لەبارەی ئۆپەراسیۆنەکەوە دەڵێت، "ئۆپەراسیۆنەکە قۆناغ بە قۆناغ دەبێت".

چیرۆکی سەرەکی: کابینەی جەنگی ئیسرائیل، پلانێکی بۆ "کۆنترۆڵکردنی" کەرتی غەززە پەسەند کردووە، کە ئامانج لێی ئەنجامدانی هێرشێکی بەرفراوانە بۆ سەر کەرتەکە بە مەبەستی ئازادکردنی بارمتە ئیسرائیلییەکان. ئەم هەنگاوە کاردانەوە و نیگەرانیی نێودەوڵەتی لێکەوتووەتەوە.

 

لێدوانی فەرمی: ئاژانسی ئەسۆشیەیتد پرێس لە زاری بەرپرسێکی ئیسرائیلییەوە گواستوویەتییەوە کە نەیویستووە ناوی ئاشکرا بکرێت، "پلانی کۆنترۆڵکردنی غەززە وردە وردە و قۆناغ بە قۆناغ جێبەجێ دەکرێت" و هیچ وادەیەکی دیاریکراویش بۆ دەستپێکردنی ئۆپەراسیۆنەکە دانەنراوە.

کاریگەری و لێکەوتەکان: پلانی ئیسرائیل بۆ کۆنترۆڵکردنی تەواوی غەززە، نیگەرانییەکانی سەبارەت بە دۆخی خراپی مرۆیی لە کەرتەکە و چارەنووسی نادیاری بارمتەکان زیاتر کردووە. لەبەر ئەم هۆکارانە، هۆشدارییەکان لەبارەی ئەگەری ڕوودانی کارەساتێکی مرۆیی بێپێشینە لە کەرتی غەززە، ڕوو لە زیادبوونن.

لەلایەکی دیکە: لەگەڵ ئەمانەشدا، بەرپرسانی ئیسرائیل جەخت دەکەنەوە کە مەبەستیان داگیرکاریی غەززە نییە، بەڵکو ئامانجیان "ڕزگارکردنیەتی لە دەستی حەماس". هەروەها، سەرۆکوەزیرانی ئیسرائیل باس لە دامەزراندنی ئیدارەیەکی "ئاشتیخواز" دەکات لە کەرتی غەززە.