تایبەت بە ئاڤا؛ هیچ هێزێک نەچووەتە دەووروبەری ماڵەکەی مەلا بەختیار

ئاڤا نیوز

سەرچاوەیەکی نزیک لە مەلا بەختیار بە ئاڤا میدیای وت،  هەموو ئەو دەنگۆیانەی باس لە دەستگیرکردنی مەلا بەختیار دەکەن، "ڕەتدەکەینەوە و هیچ هێزێک نەچووەتە دەووروبەری ماڵەکەی".

چیرۆکی سەرەکی: لە دوای نیوەڕۆی ئەمڕۆوە جموجۆڵێکی زۆری هێزە ئەمنییەکان لە سلێمانی هەیە. قەرەباڵغییەکی زۆر لە بازگەکانی تاسڵوجە و عەربەت دروستبووە. لەگەڵ ئەوەی هێزێکی زۆر لە دەووربەری ماڵی لاهوور شێخ جەنگی کۆکراونەتەوە. دەنگۆی ئەوەش بڵاوکرایەوە گوایە مەلا بەختیار دەستگیر کراوە.

زانیاریی تایبەت: سەرچاوەیەکی نزیک لە مەلا بەختیار، بەرپرسی پێشووی باڵای یەکێتیی نیشتمانیی کوردستان قسەی بۆ ئاڤا کردووە دەڵێت، بە هیچ جۆرێک هێز نەبراوەتە دەووروبەری ماڵی مەلا بەختیار نە لە گردی عەلی ناجی، نە لە باخەکەی لە مێرگەپان. ئەو ئێستا لە ژیانی ئاسایی خۆیەتی و هیچ هەوڵێکیش بۆ دەستگیرکردنی نەدراوە.

ئەوەی پێویستە بیزانیت: ڕۆژی 8ـی تەممووز، دوای ئەوەی بافڵ تاڵەبانی، هاوسەرۆکی ئەو کاتەی یەکێتی، بەرپرسانی هەریەکە لە دەزگای زانیاری و دژە تیرۆری گۆڕی. ئاڵۆزییەکانی ناوخۆی یەکێتی زیادیان کرد.