لاهوور شێخ جەنگی داوای گواستنەوەی دادگاییەکەی لە سلێمانی دەکات

ئاڤا نیوز

دەستەی سەربەخۆی مافی مرۆڤ سەردانی لاهوور شێخ جەنگی و ئەو کەسانەی کرد کە سەر بەهێزی دووپشکن و لای ئاسایش دەستبەسەرن، هاوکات زانیاری وردی لەوبارەیەوە خستە ڕوو.

لێدوانی فەرمی: سلێمان موحسین، بەڕێوەبەری ڕاگەیاندنی دەستەی سەربەخۆی مافی مرۆڤ لە هەرێمی کوردستان، بە ئاڤا میدیای ڕاگەیاند: کاتژمێر 11:00ی سەرلەبەیانی ئەمڕۆ سێشەممە، تیمی دەستەکەمان سەردانی لاهوور شێخ جەنگی و ئەو بەندکراوانەمان کرد کە سەر بەهێزی دووپشکن لە زیندانی ئاسایش و لە کانی گۆمە دەستبەسەرن.

بەڕێوەبەری ڕاگەیاندنی دەستەی سەربەخۆی مافی مرۆڤ ئەمانەشی وت:

- لاهوور شێخ جەنگی بە سەردانەکەمان دڵخۆشبوو، وتی؛ یەکەم تیمن کە هاتوون سەردانم بکەن، لەگەڵ خێزانەکەم پێشتر بە تەلەفۆن و بە ڤیدۆیۆ قسەم کردووە.

- بۆ ماوەی 40 خولەک لەگەڵ لاهوور جەنگی دانیشتین و کێشەی تەندروستی نەبوو، وتی؛ ''ئەشکەنجە نەدراوم''.

- داوامان کرد کە لاهوور جەنگی پارێزەرەکەی ببینێت.

- لاهوور شێخ جەنگی لە ژوورێکی ئاساییدا بەندکراوە و پێداویستییەکانی وەک سیسەم، تیڤی لە ژوورەکەدا هەبوو، چەند کتێبێکی لەسەر داوای خۆی بۆ هێنرابوو کە دووانیان ئینگلیزی بوون، هەروەها خواردنی وەک بەندکراوەکانی دیکە بۆ دابین دەکرێت.

-  لاهوور شێخ جەنگی وتی، ''کامێرا بۆ ژوورەکەم نەهێنراوە و بە زۆر هیچ لەسەر من جێبەجێ نەکراوە''.

- لاهوور شێخ جەنگی، ''ئەم بابەتە چاوەڕوانکراوبووە، پێشتر لەگەڵ کونسوڵخانەکانی ئەمریکا، بەریتانیا، فەرەنسا، هەروەها لەگەڵ حکومەتی هەرێمی کوردستان باسی ئەوەم کردووە کە مەترسییەکی وام لەسەر هەیە''، هەروەها لە ڕێگەی کەسێکی نزیکی خۆمەوە هەڕەشەم بۆ هات، بەم جۆرەبوو ''دوای دەستگیرکردنی شاسوار نۆرەی لاهوورە''.

- لاهوور شێخ جەنگی، ''کێشەکە لە سلێمانییە، پێمخۆشە دادگاییەکەم لە سلێمانی نەبێت''.

سلێمان موحسین ئاماژەی بەوەش کرد، 162 کەس لە هێزی دووپشک دەستگیرکراوە، "ئێمە لەگەڵ بەشێکیان دانیشتین، وتیان توندوتیژییان بەرامبەر نەکردووین، بەڵام یەکێک لەوانەی بەندکرابوو وتی ''من بەسەردان هاتبووم بۆ لای کەسێکم لە هێزی دووپشکە، بەڵام سەربەو هێزە نیم و دەستگیرکراوم.''

وتیشی، "لەگەڵ خێزانی بەندکراوەکان دانیشتین، پێمان ڕاگەیاندن کە توندوتیژی بەرامبەر بەندکراوەکانیان نەکراوە". هاوکات، ئەوانەی بەندکراون حوکمەکانیان جیاواز دەبێت، تێیاندایە کە ئازاد دەکرێن.

ئاماژەی بەوەش دا کە "خێزانێک لە ئیدارەی سەربەخۆی سۆران ناوی کوڕەکەیان پێداین و داوایان کرد بزانین لەنێو بەندکراوەکاندایە، ئێمەش پرسیارمان بۆ کرد، زانیمان لە زیندانی کانی گۆمە بەندکراوە، بۆیە داوامان لێکردن ڕێگە بەو بەندکراوە بدەن لەگەڵ دایکی قسە بکات و ڕەزامەندیمان بۆ وەرگرت".

- ئەو بەڕێوەبەری ڕاگەیاندنەی دەستەی مافی مرۆڤ لە ئاڤا میدیاوە داوایەک ئاراستەی خەڵک دەکات، ئەگەر هەر خێزانێک سۆراخی کوڕەکەی نازانێت، ناو و زانیارییەکانیان بۆ بنێرن تاوەکو بەدواداچوونی بۆ بکەن.

باکگراوند: بەرەبەیانی ڕۆژی هەینی 22-8-2025، شەڕ و پێكدادانی سەخت لە هۆتێل لالەزار، لەنێوان هێزەكانی یەكێتی و لاهور شێخ جەنگی، سەرۆكی بەرەی گەل هەڵگیرسا و چەكی قورس و مامناوەند لە شەڕەكە بەكارهێنرا، دەرەنجام سەرۆکی بەرەکە و ژمارەیەکی زۆر لە چەکدارانی نێو هۆتێلەکە دەستگیرکران و ژمارەیەکیش کوژران و برینداربوون.