ئەنجوومەنی ئاسایش: نابێت برسێتی لە غەززە وەک چەکی جەنگ بەکاربهێنرێت

ئاڤا نیوز

 

دۆخی غەززە خراپە و ڕۆژانە چەندین حاڵەتی مردن بەهۆی برسێتی و بەدخۆراکیەوە تۆمار دەکرێت، لە دانیشتنێکیدا ئەنجوومەنی ئاسایشی نەتەوە یەکگرتووەکان  لەبارەی غەززەوە ئاشکرای کرد، کە برسێتی لەو کەرتە دروستکراوی مرۆڤە و داوا لە ئیسرائیلیش دەکات دەستبەجێ هەموو سنووردارکردنێکی گەیاندنی هاوکارییەکان ڕابگرێت.

 

ئەوەی پێویستە بیزانیت: هەموو ئەندامانی ئەنجوومەنی ئاسایشی سەربە نەتەوەیەکگرتووەکان جگە لە ئەمریکا، برسێتیەکەی غەززەیان بە قەیرانی دروستکراوی مرۆڤ ناساند و هۆشداریشیان دا کە بەکارهێنانی برسێتی وەک چەکی جەنگ بەپێی یاسا مرۆییە نێودەوڵەتییەکان قەدەغەیە.

 

زانیاریی زیاتر: لە بەیاننامەیەکی هاوبەشدا، 14 ئەندامی ئەنجوومەنەکە داوای ئاگربەستی دەستبەجێ و بێ مەرج و هەمیشەیی و ئازاد کردنی سەرجەم بارمتەکانیان کرد و داوای زیادکردنی  هاوکارییەکانیان بۆ ناو کەرتی غەززە کرد. 

 

ئەوەی لەبارەیەوە دەگوترێت: ڕیاز مەنسوور، نوێنەری فەلەستین لە دانیشتنی ئەنجوومەن بەشدار بوو و جەختی لەوە کردەوە، ''ئەو توندوتیژییەی لەگەڵ دانیشتووانی غەززە دەکرێت ڕۆژ بە ڕۆژ دڕندانەتر دەبێت"