وەزیرانی دەرەوەی ئەمریکا و تورکیا بوونیادنانی ئاشتیی ئۆکراینا تاوتوێ دەکەن

ئاڤا نیوز

هاکان فیدان، وەزیری دەرەوەی تورکیا لە پەیوەندییەکی تەلەفۆنیدا لەگەڵ هاوتا ئەمریکییەکەی مارکۆ ڕۆبیۆ، دانووستانەکانی ڕووسیا و ئۆکراینا لە پێناو بوونیادنانی ئاشتی ئۆکراینا، ئاگربەستی غەززە و پێشهاتەکانی سووریای تاوتوێ کرد.

ڕاگەیێنراوی فەرمی: وەزارەتی دەرەوەی تورکیا ڕایگەیاند: هاکان فیدان پەیوەندییەکی تەلەفۆنی لەگەڵ ڕۆبیۆ ئەنجامداوە، هەوڵەکان بۆ بەردەوامیدان بە دانووستانەکانی ڕووسیا و ئۆکراینا بە ئامانجی بوونیادنانی ئاشتی، قسەی لەسەر کرا، تورکیا ئامادەیی هەمووجۆرە پشتیووانییەکی نیشان داوە. 

پابەندبوون بە ئاگربەست لە غەززە و گەیاندنی هاوکارییە مرۆییەکان بە خەڵکی ئەو کەرتە، بابەتێکی تر بوو کە فیدان جەختی لەسەر کردووەتەوە.

هاوکات، لە پەیوەندییە تەلەفۆنییەکەدا، پەیوەندییە دوو قۆڵییەکان و دوایین پێشهاتەکانی سووریاش خراوەتە بەر باس.

باکگراوند: لە مانگی شووباتەوە دانووستانەکانی ئۆکراینا و ڕووسیا لە سعوودیە و تورکیا  دەستیان پێکردووە، تورکیا و ئەمریکا ڕۆڵی گەورەیان لە چارەسەرکردنی جەنگی نێوان ڕووسیا و ئۆکراینا بینیوە.