بە فەرمانی سوودانی، سەرۆکی هەواڵگری لەگەڵ ئەحمەد شەرع کۆدەبێتەوە

ئاڤا نیوز

بۆ گەیاندنی پەیامی سەرۆکوەزیرانی عێراق سەبارەت بە چەند پرسێکی ئەمنی و ئابووری، سەرۆکی دەزگای هەواڵگری عێراق، لەگەڵ ئەحمەد شەرع، سەرۆکی سووریا لە دیمەشق کۆبووەوە. 

 

ڕاگەیێنراوی فەرمی: ئاژانسی فەرمی عێراق بڵاویکردەوە، حەمید شەتری، سەرۆکی دەزگای هەواڵگری و سەرۆکی سووریا تاوتوێی بابەتەکانی ئاسایشی سنوورەکان و بەرەنگاربوونەوەی تیرۆر و دۆخی کۆمەڵگەی عێراقی لە سووریادا کرد.


زانیاریی زیاتر: بەپێی ڕاگەیێنراوەکە، سەرۆکی دەزگای هەواڵگری و سەرۆکی سووریا لەسەر زیادکردنی هاوکاری ئەمنی بۆ بەهێزکردنی ئاسایش و سەقامگیری لە ناوچەکەدا ڕێککەوتن.

لەلایەکی دیکەوە: سەرۆکایەتیی سووریا لە بەیاننامەکەیدا ڕایگەیاند، هەردوولا ڕێککەوتن لەسەر چالاککردنی جووڵەی بازرگانی و کردنەوەی دەروازە وشکانییەکانی نێوان هەردوو وڵات بە شێوەیەک کە خزمەت بە بەرژەوەندی گشتیی بکات.

ئەمەش بزانە: مانگی نیسانی ڕابردوو، بەفەرمانی محەمەد شیاع سوودانی، سەرۆکوەزیرانی عێراق، شاندێکی فەرمی بە سەرۆکایەتیی حەمید شەتری، سەرۆکی دەزگای هەواڵگری، سەردانی دیمەشقی کرد و لەگەڵ ئەحمەد شەرع، سەرۆکی سووریا و بەرپرسانی دیکەی حکومەت کۆبووەوە.