ئەو بەرپرسانەی یەمەن کێن کە لە هێرشەکەی ئیسرائیلدا کوژران؟

ئاڤا نیوز

 

لە هێرشێکدا کە ئیسرائیل بە "بێ پێشینە" ناوی دەبات، سەرۆکوەزیران و شەش وەزیری حکومەتی یەمەنی سەر بە حووسییەکانی کوشت، لەناو کوژراوەکانیشدا وەزیری دەرەوە هەیە.

 

وێنە گەورەکە: ڕۆژی پێنجشەممەی ڕابردوو ئیسرائیل چەند ئامانجێکی لە یەمەن بۆردوومان کرد، دواتریش حکومەتی حووسییەکان کوژرانی سەرۆکوەزیران و چەند وەزیرێکیان لەمیانی بەشداریکردنیان لە چالاکییەکی حکومەت لە ڕۆژئاوای یەمەن ڕاگەیاند.

 

زانیاریی بەدەستهاتوو: هەرچەندە تائێستا گرووپی حووسییەکانی یەمەن بە فەرمی تەنیا کوژرانی سەرۆکوەزیرانی حکومەتەکەیان پشتڕاستکردووەتەوە و زانیاریی دژبەیەک لەسەر وەزیرەکان بڵاو دەکرێتەوە، بەڵام ماڵپەڕی (عەرەبی جەدید)ی قەتەری پاڵپشت بە سەرچاوەکانی لە یەمەن، بڵاوی کردووەتەوە کە  لە هێرشەکەی ئیسرائیلدا سەرۆکوەزیران و چەند وەزیرێک کوژراون ئەوانیش بریتین لە:

 

ئەحمەد غالب ڕەهوی - سەرۆکوەزیران
جەمال عامر - وەزیری دەرەوە
هاشم شەرەفەدین -  وەزیری ڕاگەیاندن
عەلی سەیف - وەزیری کارەبا
محەممەد مەدانی - وەزیری ئیدارەدانی ناوخۆ
محەممەد عیاش - وەزیری گواستنەوە
محەممەد مەولد - وەزیری وەرزش و لاوان

 

ئەوەی پێویستە بیزانیت: حکومەتی حوسییەکان لە سەرۆکوەزیران، سێ جێگری سەرۆکوەزیران و 19 وەزیر پێکدێت، سەرۆکایەتیی یەمەنی سەر بە حوسییەکان ئاشکرای کردووە لەو هێرشەدا چەند  بەرپرسێکی دیکەش بە سەختی و مامناوەند بریندار بوون و ئێستا لە ژێر چاودێریی پزیکشی دان، بەبێ ئەوەی ناو و پۆستەکانیان ئاشکرا بکات.

 

لەلایەکی دیکەوە: مەهدی مەشات، سەرۆککۆماری یەمەن (حووسییەکان) لە بڕیارێکی سەرۆکایەتیدا محەممەد مفتاح، جێگری یەکەمی سەرۆکوەزیران (لە حکومەتی حووسییەکان کە لە ئاستی نێودەوڵەتیدا دانی پێدانەنراوە) وەک سەرۆکوەزیرانی کاتیی یەمەن دەستنیشان کرد.