سوپای ئەمریکا چەکی پێشکەوتووی ئیسرائیلی لە عێراق تاقیدەکاتەوە

ئاڤا نیوز

سوپای ئەمریکا لە چوارچێوەی ڕاهێنانە سەربازییە فراوانەکانی لە عێراق، سوپای ئەمریکا مووشەکی پێشکەوتووی SPIKE NLOSی کۆمپانیای ڕافایلی ئیسرائیلی بە سەرکەوتوویی تاقیکردەوە.

ئەوەی پێویستە بیزانیت: ئیسرائیل خاوەنی توانایەکی سەربازی پێشکەوتووە، بەتایبەتی لە بواری تەکنەلۆژیای بەرگری مووشەکی و چەکی زیرەکدا، بە یەکێک لە پێشەنگەکانی ئەم بوارە لە جیهاندا دادەنرێت.

بڵاوکراوەی فەرمی: ڕۆژنامەی "جیروزالیم پۆست"ی ئیسرائیلی ئاشکرای دەکات، سوپای ئەمریکا مانۆرێکی گەورەی بە بەکارهێنانی مووشەکی SPIKE non-line-of-sight (NLOS)ی کۆمپانیای ڕافایلی ئیسرائیل ئەنجامدا. بەپێی زانیارییەکان، ئەم تاقیکردنەوەیە هەفتەی ڕابردوو لەلایەن فیرقەی فڕۆکەوانی 101ی سوپای ئەمریکاوە ئەنجامدراوە.

زانیاریی زیاتر: بەپێی ڕاپۆرتی ڕۆژنامەکە، سەرچاوە سەربازییەکانی ئەمریکا ڕایانگەیاندووە کە تاقیکردنەوەکە لەلایەن ستافی فڕۆکەوانی سەر بە فیرقەی 2 ئەنجامدراوە. ئەوان بە هەلیکۆپتەری ئەپاچی، سیستمی مووشەک و پڕۆسێسەری چەکەکانیان لە ناوچەی ئۆپەراسیۆنەکانی فەرماندەیی ناوەندی ئەمریکا تاقیکردووەتەوە.

لەلایەکی دیکەوە: بەپێی ڕۆژنامەکە، ئەنجامدانی ئەم تاقیکردنەوانە لە عێراق لە چوارچێوەی فراوانکردنی هاوکاری سەربازی ئەمریکی-ئیسرائیلیدا دێت، هاوکات لەگەڵ هەوڵەکانی ئەمریکا بۆ بەهێزکردنی تواناکانی بەرگری لە ناوچەکە.