دوای هێنانەوەی تەرمی عومرەكارانی ڕووداوەكەی ئەنبار ئەمڕۆش بریندارەكان دەگەڕێندرێنەوە

ئاڤا نیوز

وتەبێژی حەج و عومرەی هەرێمی کوردستان تایبەت بە ئاڤا ڕایدەگەیەنێت، دوای ئەوەی درەنگانی شەوی ڕابردوو تەرمی ئەو دوو هاووڵاتییە هێنرایەوە شاری هەولێر، كە لە ڕێگەی چوونیان بەرەو سعودییە بۆ مەبەستی عومرە، بە ڕووداوی هاتووچۆ گیانیان لەدەستدا، ئێوارەی ئەمڕۆش بریندارەكان دەگەیێنرێنەوە هەولێر، دوای ئەوەی لە نەخۆشخانەی فێركاریی ڕومادی چارەسەریی پێویستییان پێدرا.

چیرۆکی سەرەکی: دوێنێ چوارشەممە 3ـی ئەیلوولی 2025، ڕووداوێكی هاتووچۆ لەڕێگەی عەرعەر ڕوویدا، كاتێك چوار هاووڵاتیی كورد كە بە مەبەستی بەجێگەیاندنی عومرە لە هەرێمی كوردستانەوە بەرەو وڵاتی سعودییە بەڕێكەوتبوون؛ لە ڕێگەدا و بەدیاریكراوی لە سنووری پارێزگای ئەنبار، ئۆتۆمبێلەكەیان وەرگەڕا و بەهۆی ئەو ڕووداوەش دوو هاووڵاتیی خەڵكی هەولێر كە پیاو و ژنێكن گیانیان لەدەستدا و دووانی دیكەش بریندار بوون كە برینی یەكێكیان سەختە.

لێدوانی فەرمی: كاروان ستوونی، وتەبێژی بەڕێوەبەرایەتیی گشتییی حەج و عومرەی هەرێمی کوردستان لە لێدوانێكی بۆ ئاڤا ڕایگەیاند،   بەهەماهەنگی لەگەڵ حكومەتی فیدڕاڵ و هێزە ئەمنییەكانی پارێزگای ئەنبار، و دەستەی باڵای حەج و عومرەی عێراق، توانرا تەرمی قوربانییانی ئەو ڕووداوە بهێنرێنەوە هەولێر و ئێوارەی ئەمڕۆش بریندارەكان دەگەنەوە هەرێمی كوردستان.

ستوونی، هاوكات ڕێنمایی بە هاووڵاتییانی هەرێمی كوردستان دەدات؛ ئەوانەی بە ئۆتۆمبێلی خۆیان لەڕێگەی وشكانییەوە بۆ بەجێگەیاندنی عومرە دەچنە سعودییە، دەتوانن لەڕێگەی بەڕێوەبەرایەتیی یاخود نووسینگەكانی حەج و عومرەی كوردستان لە شارەكان و ئیدارە سەربەخۆكان، ڕێنمایی پێویست وەربگرن بەمەبەستی ئەنجامدانی ئاسانكاریی پێویست بۆ گەشتەكەیان و دوورخستنەوەیان لە هەر ڕووداوێكی نەخوازراو.