میسر داوای ڕازیبوونی ئیسرائیل بە دەستپێشخەریەکەی ویتکۆڤ دەکات

ئاڤا نیوز

وەزیری دەرەوەی میسر داوا لە ئیسرائیل دەکات ڕازی ببێت بە دەستپێشخەری نێردەی تایبەتی سەرۆکی ئەمریکا بۆ ڕاگرتنی جەنگ لە غەززە.

چیرۆکی سەرەکی: ستیڤ ویتکۆڤ، نێردەی تایبەتی ئەمریکا بۆ کاروباری ڕۆژهەڵاتی ناوەڕاست پێشنیازی کردووە ئیسرائیل بەرامبەر ئازادکردنی بارمتەکان، ئاگربەست ڕابگەیەنێت و دەروازەکان بۆ چوونە ژوورەوەی هاوکارییە مرۆییەکان بکاتەوە.

لێدوانی فەرمی: بەدر عەبدولعاتی، وەزیری دەرەوەی میسر لە پەیوەندییەکی تەلەفۆنیدا لەگەڵ ستیڤ ویتکۆڤ، نێردەی تایبەتی سەرۆکی ئەمریکا داوای کرد هەموو هەوڵێک بدرێت بۆ ڕازیکردنی ئیسرائیل بە دەستپێشخەریەکە، بە پێچەوانەوە دۆخی مرۆیی لە غەززە زۆر ترسناکتر و خراپتر دەبێت، وەزیری دەرەوەی میسر داوای لە نێردەی تایبەتی سەرۆکی ئەمریکا کردووە سنورێک بۆ بەکارهێنانی برسییەتی وەک چەکێک دژ بە خەڵکی مەدەنی دابنرێت و ئاگربەست ڕابگەیەنرێت.

زانیاریی زیاتر: سەرەڕای هەوڵ و گوشارە نێودەوڵەتییەکان بۆ ڕاگرتنی ئیسرائیل، ئەمڕۆ شەممە ئیسرائیل باڵەخانەیەکی 15 نهۆمی نیشتەجێبوونی کردە ئامانج، لە هەمان کاتدا وەزارەتی تەندروستی فەڵەستین گیانلەدەستدانی 6 کەسی دیکەی بە هۆی برسییەتییەوە ڕاگەیاند کە یەکێکیان منداڵە و بەم شێوەیەش کۆی گشتی ژمارەی ئەو کەسانەی بە هۆی برسییەتییەوە گیانیان لەدەستداوە گەشتە 382 کەس.