شڤان پەروەر لە پاریس گۆرانی "پێشمەرگە" پێشکەش بە سەرۆک بارزانی دەکات

ئاڤا نیوز

شڤان پەروەر لە پاریس چەند گۆرانییەکی پێشکەش بە سەرۆک بارزانی کرد، لەنێویشیاندا گۆرانییە بەناوبانگەکەی خۆی "بژی پێشمەرگە" بوو.

چیرۆکی سەرەکی: لەسەر داوای حکومەتی فەرەنسا، ڕۆژی هەینی 5-9-2025، سەرۆک بارزانی سەردانی ئەو وڵاتەی کرد بە مەبەستی کردنەوەی شەقامێک بەناوی پێشمەرگە لەنێو پارکی 'ئۆندرێ سیترۆین' لە پاریسی پایتەخت.

لێدوانی ڕۆژنامەوانی: سەرۆک بارزانی لە میانەی وتارەکەی بۆ ئامادەبووان و ڕۆژنامەنووسان، ئەو ساتەی لە فەرەنسا بە ساتێکی مێژوویی ناوبرد و ستایشی ڕۆڵی قارەمانانەی پێشمەرگەی کرد و سوپاسی فەرەنساشی کرد بۆ یارمەتی و پشتیوانییەکانیان بۆ دۆزی کورد.

لەلایەکی دیکەوە: هەر لە میانەی ڕێوڕەسمەکەدا، ئان هیدالگۆیە، سەرۆکی شارەوانیی پاریس ڕایگەیاند، شەقامی پێشمەرگە لە پاریس هێمای برایەتی و ئازادییە.

زانیاریی زیاتر: دوای کردنەوەی شەقامەکە، شڤان پەروەر، هونەرمەندی گەورە و نەتەوەیی کوردستان کە یەکێک بوو لە ئامادەبووان، چەند گۆرانییەکی پێشکەش بە سەرۆک بارزانی و ئامادەبووان کرد، لە نێویشیاندا گۆرانییە بەناوبانگەکەی خۆی گۆرانیی "بژی پێشمەرگە" بوو.