نەتانیاهۆ لە بارەی بە ئامانجگرتنی سەرکردەکانی حەماس: ڕزگاربوون لێیان کۆتایی بە جەنگ دەهێنێت

ئاڤا نیوز

سەرۆکوەزیرانی ئیسرائیل بەرگری لە هێرشی وڵاتەکەی بۆ سەر قەتەر دەکات و دەڵێت: بە کوشتنی سەرکردەکانی حەماس کۆتایی بە شەری غەززە دێت.

چیڕۆکی سەرەکی: ڕۆژی 9-9-2025، ئیسرائیل هێرشی کردە سەر بارەگای شاندی دانوستانکاری بزووتنەوەی حەماس لە دەوحەی پایتەختی قەتەر، بە ئامانجی کوشتنی سەرکردەکانی بزووتنەوەی حەماس، هەر چەندە ئەم هێرشە لەلایەن زۆربەی وڵاتانەوە ئیدانە کرا، بەڵام نەتانیاهۆ بەرگری لەو هێرشە دەکات. 

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل ڕایگەیاند: کوشتنی سەرکردەکانی بزووتنەوەی حەماس کە لە قەتەر نیشتەجێن، بەربەست لە بەردەم ئازادکردنی سەرجەم بارمتەکان و کۆتاییهێنان بە شەڕی غەززە لادەبات.

نەتانیاهۆ ئاماژەی بەوەش کرد، سەرکردەکانی حەماس گرنگی بە خەڵکی غەززە نادەن و ڕێگرییان لە هەموو هەوڵەکان بۆ ئاگربەست کردووە و هۆکاری درێژبوونەوەی شەڕن بۆ ماوەیەکی نادیار.

لەلایەکی دیکەوە: هەر لە وەڵامی ئەم لێدوانەی نەتانیاهۆ خانەوادەی بارمتەکانی ئیسرائیل دەڵێن: نەتانیاهۆ هۆکاری سەرەکی بەردەوامی شەڕ و ئازاد نەکردنی بارمتەکانە.