یەکەم کۆبوونەوە لەبارەی دابەشکردنی زەوی بەسەر فەرمانبەران دەکرێت

ئاڤا نیوز

وەزارەتی شارەوانی لەبارەی پرۆسەی دابەشکردنی زەوی بەسەر فەرمانبەران یەکەم کۆبوونەوە لەگەڵ شارەوانییەکان و بەڕێوەبەرایەتییە پەیوەندیدارەکان دەکات.

وێنە گەورەکە: دوای 18 ساڵ ڕاگرتنی دابەشکردنی زەوی بەسەر فەرمانبەران، سەرۆکوەزیران بارزانی هەفتەی ڕابردوو بڕیاری دا دەست بە پرۆسەکە بکرێتەوە، بۆ ئەم مەبەستەش  دەست بە ڕێکارەکان دەکرێت.

لێدوانی فەرمی: ساسان عەونی، وەزیری شارەوانی و گەشتوگوزار لە چاوپێکەوتنێکدا لەگەڵ ڕۆژان ئەبوبەکر، پێشکەشکاری بەناوبانگی ئاڤا میدیا کە ئەمشەو بڵاودەکرێتەوە، ڕایگەیاند سبەی سێشەممە یەکەم کۆبوونەوە دەکەن.

زانیاریی زیاتر: سەرەتا لەڕووی ئەندازیارییەوە دەست بە ئامادەکاری دەکرێت و زنجیرەیەک کۆبوونەوە لەوبارەیەوە دەکرێن بەمەبەستی پێدانی ڕێنمایی پێویست بە شارەوانییەکان و بەشەکانی نەخشەدانان بۆ ئامادەکاری و کەشفی زەوییەکان لە سنووری شارەوانییەکان، ئەم پرۆسەیەش شەش بۆ هەشت مانگی دەوێت.

ئەوەی پێویستە بیزانیت: بڕیاری پێدانی زەوی سەرجەم فەرمانبەرانی هەمیشەیی مەدەنی و سەربازی سوودمەندنەبوو دەگرێتەوە کە ژمارەیان زیاتر لە 200 هەزار کەسە و لە سنووری کارکردنیان زەوی وەردەگرن.