زیاتر لە 571 کیلۆ ماددەی هۆشبەر لە سنووری هەولێر لەناوبرا

ئاڤا نیوز

 

لیژنەی لەناوبردنی ماددە هۆشبەرەکانی هەرێمی کوردستان زیاتر لە 571 کیلۆگرام ماددەی هۆشبەر لە جۆرەکانی کریستاڵ، حەشیش و هێرۆینی لە سنووری هەولێر لەناو برد.

 

چیرۆکی سەرەکی: ئەمڕۆ یەکشەممە 14-9-2025، لیژنەی لەناوبردنی ماددە هۆشبەرەکان لە بەردەوامیی هەوڵەکانیان بۆ ڕێگریکردن لە بڵاوبوونەوەی ماددەی هۆشبەر لە هەرێمی کوردستان، هەستان بە سووتاندن و لەناوبردنی بڕی 571 کیلۆ و 466 گرام لە ماددەی هۆشبەر لە سنووری هەولێر.

 

لێدوانی فەرمی: نەقیب ئەرکان بیبانی، بەرپرسی ڕاگەیاندنی بەڕێوەبەرایەتیی گشتیی نەهێشتنی ماددە هۆشبەرەکان لە کۆنگرەیەکی ڕۆژنامەوانی ڕایگەیاند، تەواوی ماددە هۆشبەرەکان هی سنووری پاریزگای دهۆکە، لە ماوەی ڕابردوو ڕەوانەی دادگە تایبەتەکانی کەتن و تاوان کراوە و ئەمڕۆ لەناودەبردرێن.

 

ژمارەکان وا دەڵێن: ئەو ماددانەی دەستیان بەسەرداگیراوە، بەم شێوەیەن: 79 کیلۆ و 992 گرام کریستاڵ، شەش کیلۆ و 800 گرام مەریجوانە، 149 کیلۆ و 872 گرام هێرۆیین، 39 کیلۆ و 200 گرام حەشیش، 51 کیلۆ کریستاڵی شل، 29 کیلۆ و 553 گرام تلیاک، 81 کیلۆ و 575 گرام حەبی کەپتاگۆن، 126 کیلۆ و 737 گرام حەبی ترامادۆل، یەک کیلۆ و 287 ماددەی هۆشبەری جۆراوجۆر.

 

زانیاریی زیاتر: لەو بڕە ماددە هۆشبەرەی دەستی بەسەرداگیراوە، پارچەیەک مافور هەبووە کە بە ماددەی هۆشبەر ڕووپۆشکراوە و 5 کیلۆ و 500 گرامی تێدا بووە، 30 هەزار و 755 شیت حەبی لەناو 173 پاکەت دەستیان بەسەردا گیراوە، کۆی گشتیی ماددە هۆشبەرەکان بە 571 کیلۆ و 446 گرام دەخەمڵیندرێن، لەناوبران.