ئەو ئۆتۆمبێلەی لە هەولێر فولکەیەکی داخست دەستی بەسەردا گیرا

ئاڤا نیوز

ئۆتۆمبێلێک لە هەولێر بە سەرپێچی لە فولکەیەک دەسوڕێتەوە و ناوەڕاستی شەقامەکە دادەخات بۆ ئەوەی ئۆتۆمبێلی هاوڕێکەی تێپەڕێت. وتەبێژی بەڕێوەبەرایەتی هاتووچۆی هەولێر دەڵێت، دەست بەسەر ئەو ئۆتۆمبێلەدا گیراوە.

چیرۆکی سەرەکی: چەند شەوێک لەمەوبەر ئۆتۆمبێلێکی جۆری لاندگرۆزەری جام ڕەش لە کاتی سووڕانەوەدا لە ناوەڕاستی شەقام وەستا و فولکەیەکی سووڕانەوەی داخست، تەنیا بۆ ئەوەی ئۆتۆمبێلی هاوڕێکەی بسووڕێتەوە، هەر زوو لە تۆڕەکۆمەڵایەتییەکان ڤیدۆکەی بڵاوبووەوە، بەڕێوەبەرایەتی هاتووچۆی هەولێریش بەدواداچوونی بۆ بابەتەکە کرد.

لێدوانی فەرمی: عەقید هێمن ئەمین، وتەبێژی بەڕێوەبەرایەتی هاتووچۆی هەولێر بە ئاڤا میدیای ڕاگەیاند: ڕۆژی 2025-09-21، ئەو ئۆتۆمبێلە دەستی بەسەرداگیرا، چونکە سەرپێچی هاتووچۆی کردووە، جگە لە پۆلیسی هاتووچۆ کەس دەسەڵاتی داخستنی شەقامی نییە.

وتەبێژی بەڕێوەبەرایەتی هاتووچۆی هەولێر وتیشی: ئۆتۆمبێلەکە لە جۆری لاندگرۆزەر هایلۆکسە، بۆ ماوەی 10 ڕۆژ دەستی بەسەردا دەگیرێت، هەروەها سزای سووڕانەوەی سەرپێچی بۆ هەژمار دەکرێت.