یوتیوب زیاتر لە 20 چەناڵی دیاری کوردی دەسووتێنێت

ئاڤا نیوز

لە یەک کاتدا زیاتر لە 20 چەناڵی یوتیوبەرانی کورد دەسووتێت و خاوەنەکانیان زیاتر لە 300 هەزار دۆلار زیانیان بەردەکەوێت. 

چیرۆکی سەرەکی: ڕۆژی پێنجشەممەی ڕابردوو 21-9-2025، زیاتر لە 20 چەناڵی گەورە و دیاری یوتیوبەرانی کورد دەوەستێت، هۆکارەکەش بەهۆی سزای کۆپی ڕایتەوە بووە بۆ سەر یوتیوبێک کە پەیوەندیی بەو یوتیوبانەوە نەبووە، تەنها پێشتر لەسەر سێرڤەرێک لیست کراوە و پارەکانی لە یوتیوب وەرگرتووە، کە ئێستا ئەو 20 چەناڵانەی لەسەر لیست کراوە و لەڕێگەیەوە پارەکانیان لە یوتیوب وەردەگرن.

لێدوانی فەرمی: ڕامان لوقمان عەبدوڵڵا، یوتیوبەری دیاری کورد و خاوەنێ چەناڵی "ڕامۆکوردش"، بە ئاڤای ڕاگەیاند: تەواوی هەوڵەکانمان بۆ گەڕانەوەی چەناڵەکانمان خستووەتەگەڕ، پەیوەندیمان بە یوتیوبەوە کردووە و پێمان وتوون داخستنی چەناڵەکانمان زیانی زۆری لێداوین و پێویستە بۆمان بگەڕێننەوە، چونکە ئێمە بەپێی یاساکانی یوتیوب کار دەکەین و هیچ هەڵەیەکمان نەکردووە ببێتە هۆی داخستنی چەناڵەکانمان.

زیانی داخستنی تەواوی ئەو چەناڵانە بە زیاتر لە 300 هەزار دۆلار دەخەمڵێندرێت.

لەلایەکی دیکەوە: مەبەست بەهائەددین، یوتیوبەری دیاری کورد کە تەواوی ئەو چەناڵانەی لە یوتیوب لیست کردووە بە ئاڤای گوت: توانیومانە یەکێک لەو چەناڵانە بگەڕێنێنە کە داخراوە، هەوڵەکانیشمان بۆ گەڕاندنەوەی تەواوی چەناڵەکانی دیکە خستووەتەگەڕ و کاری لەسەر دەکەین، چەناڵێکیشمان گەڕاندووەتەوە کە ناوی کورد "گەیمەرە".

ژمارەکان وادەڵێن: ئاڤا میدیا ناوی بەشێکی ئەو چەناڵانەی لایە کە ئێستا سووتاون لەوانە؛- ڕامۆ کوردش، ئەکتەر گەیمینگ، مستەر شکۆ، مستەر میر، ژیار گەیمەر، هۆزان بی 12، ژڤار بی 12، زانا ئاڵتون، بیلال مەلیک، حەمکۆ، بەهەست بەهائەددین، هاوکار کینگ، بیکەی کلیپ.