ئاڤای خەڵک؛ ئاڤا بەداواداچوون بۆ کێشەی ژمارەیەک کرێکاری پاککەرەوە لە هەولێر دەکات

ئاڤا نیوز

ژمارەیەک لە کارمەندی پاککەرەوە لە یەکێک لە نەخۆشخانەکانی شاری هەولێر، لە ڕێگەی ئاڤاوە سکاڵا دەکەن و دەڵێن، ئەو کۆمپانیایەی گرێبەستیان لەگەڵدا کردووە، مانگانە بەشێک لە مووچەکانیان دەبڕێت و پشووەکانیشیانی کەم کردووەتەوە، هاوکات هەڕەشەی دەرکردنیان لێدەکات ئەگەر ئەم ڕاستییە بۆ لیژنەکانی تەندروستی ئاشکرا بکەن.

 

چیرۆکی سەرەکی: ئەو کارمەندانە کە نەیانویستووە ناویان ئاشکرا بکرێت لە ترسی لەدەستدانی کارەکانیان، باس لەوە دەکەن کە بەپێی ئەو گرێبەستەی لەگەڵ کۆمپانیاکەدا واژۆیان کردووە، دەبوایە مووچەکانیان بە شێوەیەکی جیاواز بوایە. یەکێک لە پاککەرەوەکان دەڵێت: "لەسەر گرێبەستەکەمان نووسراوە، ئەو کەسانەی دوو شەفت دەوام دەکەن مووچەیان 665 هەزار دینارە، ئەوانەش کە یەک شەفتن مووچەیان 330 هەزار دینارە. بەڵام لە ڕاستیدا ئەمە تەنها نووسینی سەر کاغەزە."

 

ئەوەی پێویستە بیزانیت: بەپێی قسەی سکاڵاکاران، لە کردەوەدا کۆمپانیاکە جیاوازییەکی زۆر لە مووچەکانیاندا دەکات: ئەوانەی دوو شەفت دەوام دەکەن: لەبری 665 هەزار دینار، مانگانە تەنها 450 هەزار دینار وەردەگرن، کە دەکاتە 215 هەزار دینار کەمتر. ئەوانەی یەک شەفت دەوام دەکەن: لەبری 330 هەزار دینار، مانگانە 300 هەزار دینار وەردەگرن، کە 30 هەزار دینار کەمترە.

 

کاریگەری و لێکەوتەکان: ئەم کارمەندانە ئاماژە بۆ ئەوەش دەکەن کە ناتوانن سکاڵای خۆیان بگەیەننە لایەنە پەیوەندیدارەکان، بەتایبەت ئەو لیژنانەی وەزارەتی تەندروستی کە سەردانیان دەکەن. یەکێکیان دەڵێت: "کۆمپانیاکە پێی وتووین، هەر کەسێک مووچە ڕاستەقینەکەی خۆی بە لیژنەکان بڵێت، ڕاستەوخۆ دەردەکرێت."

 

لەلایەکی دیکە: جگە لە کێشەی مووچە، ئەو کۆمپانیایە مافێکی دیکەی ئەم کرێکارانەی پێشێل کردووە، ئەویش مافی پشووە. لە کاتێکدا دەبێت لە مانگێکدا چوار ڕۆژ پشوویان (ئۆف) هەبێت، بەڵام تەنها دوو ڕۆژ پشوویان پێدەدرێت.

 

لێدوانی فەرمی: لەبارەی ئەو کێشەیەوە بەڕێوەبەری دەستەبەری کۆمەڵایەتیی هەولێر ڕایگەیاند: "با نوێنەرێکیان سەردانی بەڕێوەبەرایەتیی دەستەبەری کۆمەڵایەتی بکات و زانیارییەکانمان پێ بدات. بە دڵنیاییەوە لێکۆڵینەوەی ورد لە بابەتەکە دەکەین."

 

بەڕێوەبەری دەستەبەری کۆمەڵایەتیی هەولێر جەختیشی کردەوە: "ئەگەر ئەم سکاڵایە ڕاست بێت، کۆمپانیاکە دەدەینە دادگای کار. دڵنیا بن کە چەندین کەیسی لەم جۆرەمان لە ڕێگەی دادگای کارەوە چارەسەر کردووە و ئەم کێشەیەش چارەسەر دەکەین."