ئەنجوومەنی وەزیرانی کوردستان بڕیاری جێبەجێکردنی چەند پڕۆژەیەکی گرنگ لە هەڵەبجە دەدات

ئاڤا نیوز

سەرۆکی دیوانی ئەنجوومەنی وەزیرانی کوردستان لە کۆنگرەیەکی ڕۆژنامەوانی چەند بڕیارێکی گرنگی ئەنجوومەنی وەزیران لە بەرژەوەندی خەڵکی هەڵەبجە ڕادەگەیێنێت.

چیرۆکی سەرەکی: ئەمڕۆ دووشەممە 2025-10-06، سەرۆکی دیوانی ئەنجوومەنی وەزیرانی کوردستان لەگەڵ پارێزگاری شارەکە و ئەنجوومەنی پاڵپشتی هەڵەبجە کۆبووەوە و مژدەی چەند پڕۆژەیەکی گرنگی حکومەتی بۆ خەڵکی شارەکە ڕاگەیاند.

لێدوانی فەرمی: ئومێد سەباح، سەرۆکی دیوانی ئەنجوومەنی وەزیرانی کوردستان لە کۆنگرەیەکی ڕۆژنامەوانی ڕایگەیاند، سەرۆک بارزانی فەرمانی کردووە لە ڕێگەی حکومەتەوە خزمەتی هەڵەبجە بکرێت.

زانیاریی زیاتر: لەبارەی ئەو پڕۆژانەی کە ئەنجوومەنی وەزیران بڕیاری داوە لە هەڵەبجە جێبەجێ بکرێن، ئومێد سەباح وتی،  بە بڕی 25 ملیار دینار پڕۆژە لە هەڵەبجە جێبەجێدەکرێت، داواشی کرد پێویستە وەبەرهێنەران دەرفەتەکانی وەبەرهێنان لە هەڵەبجە بقۆزنەوە، هاوکات ڕەزامەندی لەسەر دامەزراندنی 250 کەسی دیکە بۆ هەڵەبجە دراوە.

٠ دەروازەی سنووریی سازان وەکو دەروازەیەکی فەرمی دەکرێتەوە

٠ بۆردێکی تەندروستی بۆ چارەسەرکردنی بەرکەوتووانی چەکی کیمایی دروست دەکرێت

٠ لیژنەیەک بۆ چارەسەرکردنی کێشەی زەویوزاری هەڵەبجە پێکدەهێنرێت

لەبەرامبەردا: نوخشە ناسیح، پارێزگاری هەڵەبجە ڕایگەیاند، دەستخۆشی و سوپاسمان بۆ سەرۆک بارزانی هەیە، ئەوەی ئەمڕۆ ڕوویدا کارە دروستەکەیە بۆ هەڵەبجە، دەستخۆشی لە ئەنجوومەنی وەزیران دەکەین، زۆر دڵسۆزانە کار بۆ هەڵەبجە دەکرێت.

وتیشی، دروستکردنی ڕێگاوبان بۆ شوینە گەشتیارییەکان زۆر گرنگە، ئایندەیەکی گەش چاوەڕێی پارێزگای هەڵەبجە دەکات.