سەرۆک لیستێک لە هەڵبژاردنی پەرلەمانی عێراق دوورخرایەوە

ئاڤا نیوز

بەهۆکاری پەیوەست بە ڕەفتار و ڕەوشت و "بێڕێزیکردن"ـی بە بەشداربووانی ڕێوڕەسمە ئاینییەکانی مانگی موحەڕەم،  کۆمیسیۆنی هەڵبژاردنەکانی عێراق سەجاد سالم، پەرلەمانتاری ئێستا و سەرۆکی لیستی هاوپەیمانیی (بەدیل) لە پارێزگای واست-ی لە کێبرکێی هەڵبژاردن دوورخستەوە.

 

وێنە گەورەکە: بۆ هەڵبژاردنی پەرلەمانی عێراق کە بڕیارە 11ـی مانگی داهاتوو بکرێت، حەوت هەزار و 768 کەس خۆیان کاندید کردووە، بەهۆکاری جۆراوجۆریش کۆمیسیۆن شیاوبوونی زیاتر لە 750 کاندیدی ڕەتکردووەتەوە و لە کێبرکێی هەڵبژاردن دووریخستوونەتەوە.

 

ڕاگەیێنراوی فەرمی: ئەنجوومەنی کۆمیسیارانی کۆمیسیۆنی هەڵبژاردنەکانی عێراق لە کۆبوونەوەی ئەمڕۆیدا و بەزۆرینەی دەنگ، سەجاد سالم پەرلەمانتاری ئێستا و سەرۆکی لیستی هاوپەیمانی بەدیل لە پارێزگای واست-ی لە کێبرکێی هەڵبژاردن دوورخستەوە.

 

بەگوێرەی نوسراوەکەی کۆمیسیۆن، هۆکاری دوورخستنەوەی ئەو کاندیدە بۆ نەبوونی مەرجی ڕەفتار و ڕەوشتی گونجاو و "بێڕێزیکردن"ـی ئاشکرا و ڕوونی بە بەشداربووانی ڕێوڕەسمە ئاینییەکانی مانگی موحەڕەم دەگەڕێتەوە.