زانیاریی له‌باره‌ى هەڵگرانی پاسپۆرتی دۆمینیکا و کاریبی

ئاڤا نیوز

دوو ڕۆژە دەنگۆی ئەوە هەیە یەکێتی ئەوروپا مەرجی وەرگرتنی ڤیزای پێشوەختەی خستبێتە سەر پاسپۆرتەکانی دۆمەنیکا و کاریبی، لەبارەیەوە ڕوونکردنەوە دەدرێت و بابەتەکە بەمشێوەیە نییە. 

چیرۆکی سەرەکی: چەند ساڵێکە لە هەرێمی کوردستان و عێراق خەڵکێکی زۆر بەتایبەت بەرپرسان و دەوڵەمەندان خواستی کڕین و وەرگرتنی پاسپۆرتی وڵاتانی ڕۆژئاوایان هەیە، بەتایبەت دۆمەنیکا و کاریبی بە پارەیەکی زۆر بۆ خۆیان و هاوسەر و منداڵەکانیان دەیکڕن، ئێستا هەزاران کەس هەیانە.

زانیاریی زیاتر: یەکێک لە تایبەتمەندییەکانی ئەم پاسپۆرتانە ئەوەیە، خاوەنی پاپسۆرتەکە دەتوانێت بۆ زیاتر لە 130 وڵات بەبێ ڤیزا گەشت بکات، لەوانەش وڵاتانی ئەوروپا.

لێدوانی فەرمی: د.سالار مەرزانی، بەڕێوەبەری کۆمپانیایەکی خزمەتگوزاریی ڤیزا و پاسپۆرت، بە ئاڤای وتووە، بڕیارەکە بەمجۆرە نییە کە بڵاوبووەتەوە، بەڵکو یەکێتی ئەوروپا بڕیاری داوە لە ساڵی 2026ەوە هەڵگرانی پاسپۆرتی دۆمەنیکا و کاریبی بۆ ئەوەی گەشت بکەن بۆ وڵاتانی ئەوروپا، پێویستییان بە ڕەزامەندی پێشوەختە دەبێت کە پێی دەڵێن ئیتیاس، سیستەمی پرسی پێشوەختەی گەشتی ئەوروپا. 

- ئەم پرۆسەیە وەک ڤیزا نییە، بەڵکو بەشێوەی ئەلیکترۆنی دەکرێت، تێچووەکەی لەنێوان 10 بۆ 12 یۆرۆیە و لە ساڵێکدا تەنیا یەکجار وەردەگیرێت، ماوەیەکی کەمیشی پێویستە.

- لە بەریتانیاش شتێکی لەمجۆرە هەیە، هەڵگرانی پاسپۆرتی سانت کیتس و سانت لوشیا دەبێت پێشوەختە ڕەزامەندی وەربرگرن پێش گەشتکردن.