بۆ یەکلاکردنەوەی پۆستی پارێزگاری کەرکووک نزیکبوونەوە لەنێوان لایەنەکان دروستبووە

ئاڤا نیوز

 

دانیشتنەکان بۆ یەکلاکردنەوەی پارێزگاری کەرکووک بەردەوامن و نزیکبوونەوە لەنێوان لایەنەکان هەیە و ئاراستەکان بەرەو نۆرەن.

 

وێنە گەورەکە: هەرچەندە کورد خاوەنی زۆرترین کورسیی ئەنجوومەنی پارێزگای کەرکووکە، بەڵام عەرەب و تورکمان ڕازی نین پۆستی پارێزگار بۆ کورد بێت، بەم هۆیەوەش زیاتر لە سێ مانگە پارێزگار دانەنراوە.

 

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە ئاڤا نیوزی گوت، دانیشتنەکان بۆ یەکلاکردنەوەی پارێزگاری کەرکووک بەردەوامن و نزیکبوونەوە لەنێوان لایەنە براوەکاندا هەیە.

 

زانیاریی زیاتر: ڕەنگە دانیشتنی لایەنە براوەکانی کەرکووک لەگەڵ سوودانی تاوەکو گەڕانەوەی لە سەردانە چاوەڕوانکراوەکەی بۆ واشنتن ڕابگیرێت. سەرۆکی فراکسیۆنی پارتی لە ئەنجوومەنی پارێزگای کەرکووک وا دەڵێت.

 

زانیاریی بەدەستهاتوو: سازشنەکردنی لایەنەکان بۆ یەکتر هۆکاری ئەوەیە بەو ئاراستەیە بچن کە دەبێت پارێزگاری کەرکووک بە نۆرە بێت لەنێوان لایەنە براوەکاندا.

 

ئەوەی پێویستە بیزانیت: تاوەکو ئێستا محەممەد شیاع سوودانی، سەرۆکوەزیرانی عێراق دوو کۆبونەوەی لەگەڵ هێزە براوەکانی کەرکووک کردووە، بەڵام بەهۆی ناکۆکییەوە تاوەکو ئێستا هیچ ئەنجامێکی نەبووە.