تەندروستیی هەولێر چەند تیمێک بۆ ڕۆژی هەڵبژاردن ئامادە دەکات

ئاڤا نیوز

بەڕێوەبەرایەتیی تەندروستیی هەولێر ئامادەکاری بۆ بەڕێوەچوونی ڕۆژی هەڵبژادنی ئەنجوومەنی نوێنەرانی عێراق لە سەنتەری هەولێر و دەروبەری کردووە و چەندین تیمی پزیشکی و ئەمبوڵانسی ئامادە کردووە.

چیرۆکی سەرەکی: تەندروستیی هەولێر پلانی داناوە بۆ هەبوونی هەر حاڵەتێک لە بنکەکانی دەنگدان و لەکاتی بەڕێوەچوونی هەڵبژاردن، ژمارەیەک تیمی پزیشكی لە سەنتەری شاری هەولێر و دەروبەری هەولێر ئامادە کردووە.

لێدوانی فەرمی: سامان سەلمان، بەڕێوەبەری ڕاگەیاندنی تەندروستیی هەولێر، بە ئاڤا میدیای ڕاگەیاند، تەندروستیی هەولێر 10 تیمی پزیشکی بۆ بەڕێوەچوونی ڕۆژی هەڵبژاردن لە سەنتەری شاری هەولێر ئامادە کردووە، لە دەوروبەری شاری هەولێریش لە خەبات و دەشتی هەولێر و هەریر و شەقلاوە تیمی پزیشکی و ئەمبوڵاس جێگیر کراون، هاوکات لە هەر حاڵەتێکی پێویست هاووڵاتیان دەتوانن لە ڕێگەی ژمارە 122 تیمی فریاکەوتنی خێرا ئاگادارمان بکەنەوە بۆ ئەوەی تیمەکانمان بگەنە شوێنەکە.

زانیاریی زیاتر: بەڕێوەبەری ڕاگەیاندنی تەندروستیی هەولێر، دەڵێت، هەر تیمێک پێکهاتووە لە ئەمبوڵانسێک و کارمەند و پزیشکێك، بۆ ئەوەی هەر حاڵەتێک بێتە پێشەوە بەشێوەیەکی خێرا چارەسەر بکرێت، لە هەمانکاتدا دەرگای فریاکەوتنەکانمان و بنکەکانی تەندروستی لە هەولێر و دەوروبەری کراوەدەبێت بۆ پێشوازی هاووڵاتیان.