چیرۆکی کەوتنەوەی ئاگرەکەی بازاڕی لەنگەی هەولێر

ئاڤا نیوز

بەیانی ئەمڕۆ جارێکی دیکە ئاگر لە بازاڕاری لەنگەی هەولێر کەوتەوە و بەهۆیەوە دەیان دووکان سووتان.

چیرۆکی سەرەکی: دەوروبەری کاتژمێر شەشی بەیانی ئاگر لە دووکانێکی قوماش لە کۆڵانی حیجابفرۆشان کەوتووەتەوە، دوای ماوەیەک بە زیانێکی کەم کۆنترۆڵ کراوە، بەڵام جارێکی دیکە کەوتووەتەوە و ئەمجارە تەشەنەی سەندووە.

لێدوانی فەرمی: کاروان میراودەلی، گوتەبێژی بەرگریی شارستانیی هەولێر لە کۆنگرەیەکی ڕۆژنامەوانیدا ڕایگەیاند، ئاگرەکە بە دوو قۆناغ بووە:

- سەرەتا کاتژمێر 6:43 خولەکی بەیانی ئەمڕۆ تیمەکانی ئێمە لە ئاگرەکە ئاگادارکرانەوە و ئەوکات کۆنترۆڵ کرا.

- دوای گەڕانەوەی تیمەکان، کاتژمێر 7:47 خولەک دووبارە پەیوەندیمان پێوە کرایەوە کە دووبارە سەریهەڵداوەتەوە.

زانیاری زیاتر: 17 تیمی ئاگرکوژێنەوە و دەیان کارمەندی ئاسایش و پۆلیس لە هەوڵی کۆنترۆڵکردنی ئاگرەکەدا بوون، نزیکەی کاتژمێر 9:30 خولەک بەتەواوی کۆنترۆڵ کرا.

زیانە سەرەکییەکان: بەپێی زانیارییەکانی ڕزگار کۆچەر، پەیامنێری ئاڤا نیوز لە شوێنی ڕووداوەکە، ئاگرەکە بەتەواوی دوو کۆڵانی بازاڕەکەی گرتووەتەوە و بەهۆیەوە زیاتر لە 50 دووکان سووتاون.

ئەوەی پێویستە بیزانیت: لە ماوەی 41 ڕۆژی ڕابردوودا ئەوە دووەمجارە ئاگر لە بازاڕەکە دەکەوێتەوە، جاری ڕابردوو زیاتر لە 160 دووکان سووتان.