سوودانی: ڕێگە نادەین هیچ هێزێک خاکی عێراق بۆ هێرشکردنە سەر دراوسێکانمان بەکار بهێنێت

ئاڤا نیوز 

 

سەرۆکوەزیرانی عێراق ڕایدەگەیێنێت، لەگەڵ سەرۆککۆماری تورکیا باسیان لە هەماهەنگییە ئەمنییە دووقۆڵییەکان کردووە. دەشڵێت "ڕێگە نادەین هیچ هێزێک خاکی عێراق بۆ هێرشکردنە سەر وڵاتانی دراوسێ بەکار بهێنێت".

وێنە گەورەکە: ڕۆژی 22-4-2024 ڕەجەب تەیب ئەردۆغان، سەرۆککۆماری تورکیا، بە سەردانێک گەیشتە بەغدا و لەگەڵ محەممەد شیاع سوودانی، سەرۆکوەزیرانی عێراق کۆبووەوە، لە کۆبوونەوەکەدا چەندین دۆسیەی گرنگ لە نێوان هەردوو سەرۆک تاوتوێ کران و چەندین یادداشت و ڕێککەوتنیش واژۆ کران.

لێدوانی فەرمی: سوودانی ڕایگەیاند: باسمان لە هەماهەنگیی ئەمنی کرد، بۆ ئەوەی بتوانین بە یەکەوە ڕووبەڕووی ئەو ئاڵنگارییانە ببینەوە کە گرووپە چەکدارەکان دروستیان کردوون و "هۆکارن بۆ تیرۆر و ئاسایشی هەردوو وڵات پێشێل دەکەن".

زانیاریی زیاتر: "ناوچە سنوورییەکانی نێوانمان کێشەی ئەمنییان هەیە و پێویستیان بە سەقامگیریی زیاترە. ئاسایشی عێراق و تورکیا پێکەوە گرێ دراوە لە یەکتر جیا نابێتەوە، ڕێگەش نادەین هیچ هێزێک خاکی عێراق بەکار بهێنێت بۆ هێرشکردنە سەر وڵاتانی دراوسێ"، ئەمە سوودانی وای گوت.