دۆسیەی ئەمنیی کەرکووک لە سوپای عێراق وەردەگیرێتەوە

ئاڤا نیوز

 

دوای نزیکەی حەوت ساڵ لە ڕادەستکردنی دۆسیەی ئەمنیی کەرکووک بە سوپای عێراق، بڕیارە لە کۆتایی ئەمساڵ دۆسیەی ئەمنیی پارێزگاکە ڕادەستی پۆلیسی خۆجێیی بکرێتەوە.

 

وێنە گەورەکە: دوای ڕووداوەکانی 16ی ئۆکتۆبەر، دۆسیەی ئەمنیی شاری کەرکووک لە پۆلیسی خۆجێیی وەرگیراوەتەوە و ڕادەستی سوپای عێراق کراوە، لەوکاتەوە فەرماندەی ژووری ئۆپراسیۆنەکانی کەرکووک دەسەڵاتی یەکەمی سەربازییە لە شارەکە.

 

لێدوانی فەرمی: کاوە غەریب بەڕێوەبەری پۆلیسی کەرکووک بە ئاڤا نیوزی ڕاگەیاند: "گواستنەوەی دۆسیەی ئەمنیی کەرکووک لە وەزارەتی بەرگریی عێراقەوە بۆ وەزارەتی ناوخۆ دوانەخراوە، بەڵکو تاوەکو کۆتایی ئەمساڵ ڕێکارەکانی گواستنەوەی دۆسییەکە تەواو دەبێت و ڕادەستی پۆلیسی خۆجێیی کەرکووک دەکرێت".

 

گۆشەیەکی دیکەی دیمەنەکە: پێشتر عەمید میقداد مووسەوی، گوتەبێژی وەزارەتی ناوخۆی عێراق ئەمەی بە میدیای عێراقی گوتبوو: "پرۆسەی گواستنەوەی دۆسیەی ئەمنیی بەردەوامە و تاوەکو ئێستا شەش پارێزگامان وەرگرتووەتەوە، پلان هەیە تاوەکو کۆتایی 2024 دۆسیەی ئەمنی هەریەک لە پارێزگاکانی نەینەوا، ئەنبار و سەڵاحەددین وەربگرینەوە. بەڵام وەرگرتنەوەی دۆسیەی ئەمنیی پارێزگاکانی کەرکووک، بەغدا، میسان و بەسرە دەکەوێتە ساڵی 2025". 

 

ئەوەی پێویستە بیزانیت: بڕیار بوو سەرەتای مانگی سێی ئەمساڵ، پرۆسەی ڕادەستکردنەوەی دۆسیەی ئەمنیی کەرکووک تەواو بێت، بەڵام بە هۆکاری جیاواز دواخرا.