ئایدن مەعرووف: هەوڵی گەڕاندنەوەی كورسی كۆتاكان هەیە

ئاڤا نیوز

وەزیری هەرێم بۆ کاروباری پێکهاتەکان ڕایگەیاند، بەبێ پارتی هەڵبژاردنی پەرلەمانی کوردستان ناکرێت، دەشڵێت "سەرۆکی هەرێمی کوردستان لە هەوڵدایە بۆ گەڕاندنەوەی کورسی کۆتاکان".

وێنە گەورەکە: دوای بڕیاری دادگەی فیدراڵی عێراق بۆ هەڵوەشاندنەوەی کورسی کۆتای پێکهاتەکان لە پەرلەمانی کوردستان، پارتی و بەشێک لە لایەنەکانی هەرێمی کوردستان ناڕازیین لە شێوازی بەڕێوەچوونی هەڵبژاردن و تێبینییان هەیە.

لێدوانی فەرمی: ئایدن مەعرووف، وەزیری هەرێم بۆ کاروباری پێکهاتەکان لە سەردانێکدا بۆ ئیدارەی سەربەخۆی زاخۆ ڕایگەیاند: سەرۆک بارزانی هەڵوێست و ڕۆلێکی زۆر گرنگی هەبووە و لە پشتیوانیکردن و داواکارییەکانی پێکهاتەکان، ئێستا هەوڵ هەیە بە تایبەت لەلایەن سەرۆکی هەرێمی کوردستانەوە کە لە بەغدایە بۆ گەڕاندنەوەی کورسی پێکهاتەکان.

زانیاریی زیاتر: ئێمە هەموومان دەزانین کە هەڵبژاردن لە کاتی خۆیدا ناکرێت، لەبەر ئەوەی پارتی تێبینی هەیە و ئامادە نییە بەو شێوەیەی ئێستا بەشدار بێت، هەموو هەوڵەکان و شاندەکانی هەرێمی کوردستان لە بەغدا گەیشتوونەتە قۆناغێک کە دووبارە کورسی کۆتاکان بگەڕێنرێنەوە. ئایدن مەعرووف ئەمەی گوت.