ڤیدیۆ؛ ئیسرائیل هێرشدەکاتە سەر بارەگایەکی سوپای پاسداران لە سووریا

ئاڤا دیجیتاڵ

بە ژمارەیەک مووشەک ناوچەی سەیدە زەینەب لە باشووری دیمەشقی پایتەختی سووریا بۆردوومانکرا و کوژراو و برینداری لێکەوتەوە. سەرچاوەکان دەڵێن بارەگایەکی سەر بە سوپای پاسدارانی ئێران لەلایەن ئیسرائیلەوە کراوەتە ئامانج.

لێدوانی فەرمی: رامی عەبدولڕەحمان، بەڕێوەبەری روانگەی سووری بۆ مافەکانی مرۆڤ رایگەیاندووە، “تەقینەوەیەکی بەهێز لە نزیک مەزارگەی سەیدە زەینەب لە دەوروبەری دیمەشق روویداوە، ئەگەر هەیە ئیسرائیل هێرشەکەی ئەنجامدابێت. 

 

بەڕێوەبەری روانگەی سووری ئاماژەی بەوە کردووە، ئەو شوێنەی کراوەتە ئامانج بارەگایەکی چەکدارانی حیزبوڵڵای لوبنان و سوپای پاسدارانی ئێرانە.

چی لەبارەوە دەگوترێت: میدیاکانی ئێران دەڵێن بەهۆی هێرشەکەوە دوو کەس کوژراون و ژمارەیەکی دیکەش بریندار بوون، هێرشەکەش لەلایەن ئیسرائیلەوە بۆ سەر بارەگایەکی راوێژکاری سوپای پاسداران ئەنجامدراوە.

هاوکات میدیاکانی ئیسرائیل بڵاویانکردووەتەوە، بۆردوومانەکە شوێنێکی سەر بە سوپای پاسدارانی ئێرانی کردووەتە ئامانج.


هەروەها میدیا عەرەبییەکان ئاماژەیان بەوە کردووە، بەپێی زانیارییە سەرەتاییەکان هێرشەکە بە ژمارەیەک مووشەک ئەنجامدراوە، مووشەکەکانیش لە ناوچەی جۆڵانی ئیسرائیلەوە ئاراستەی باشووری دیمەشق کراون و، بەهۆیەوە حەوت چەکداری لایەنگری ئێران کوژراون.

ڤیدیۆی ساتی هێرشەکە ببینە