وەزیری نەوتی عێراق: لە کۆبوونەوەی داهاتووی ئۆپێک بەرهەمهێنان کەم ناکەینەوە

ئاڤا نیوز

 

وەزیری نەوتی عێراق ڕایگەیاند، لە کۆبوونەوەی داهاتووی ئۆپێکدا پشتیوانی لە کەمکردنەوەی بەرهەمهێنانی نەوت ناکەن. 

 

وێنە گەورەکە: وەزارەتی نەوتی عێراق لە کۆتایی ساڵی ڕابردوو ڕایگەیاند، لە سەرەتای ساڵی 2024ـەوە، درێژە بە کەمکردنەوەی بەرهەمهێنانی نەوت دەدات و بە شێوەیەکی ئارەزوومەندانە ڕۆژانە 211 هەزار بەرمیل نەوت کەمدەکاتەوە.

 

لێدوانی فەرمی: حەیان عەبدولغەنی، وەزیری نەوتی عێراق ڕایگەیاند، "عێراق کە دووەم گەورەترین بەرهەمهێنەرە لە ئۆپێکدا، کەمکردنەوەی پێویستی لە بەرهەمهێناندا کردووە و لە کۆبوونەوەی داهاتووی ئۆپێکدا پشتیوانی لە دووبارە کەمکردنەوەی بەرهەمهێنان ناکەین."

 

ئەمەش بزانە: بڕیاری ڕێکخراوی ئۆپێک بە کەمکردنەوەی بەرهەمهێنانی نەوت لەلایەک و نزمیی نرخی جیهانیی نەوت لەلایەکی دیکە زیانی بە ئابووریی عێراق گەیاندووە، دیارترینیان کورتهێنانە لە بودجەی گشتیی عێراق بۆ ساڵی 2024.