له چوارچێوەی هەژماری من؛ پڕۆسەی تەوتینی مووچە دەستی پێ کرد

ئاڤا نیوز 

 

وەزارەتی دارایی و ئابووریی هەرێمی کوردستان ڕایگەیاند، لیستی ناوی 368 مووچەخۆری هەرێمی کوردستانی له چوارچێوەی 'هەژماری من' بۆ تەوتین، ڕەوانەی بەغدا کراوە. 

 

بۆچی گرنگە؟ حکومەتی هەرێمی کوردستان ئاسانکاریی تەواوی کردووە تاوەکو مووچەخۆران لە بانکە تۆمارکراوەکانی بانکی ناوەندی عێراق مووچە وەربگرن، دواهەنگاویش دەستپێکردنی ناردنی ناوی لیستی مووچەخۆرانە بۆ بانکی بازرگانیی عێراق بۆ تەوتین و بەمەش هیچ بیانوویەک بۆ وەزارەتی دارایی عێراق نەماوەتەوە بۆ ناردنی مووچە.

 

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤا نیوزی ڕاگەیاند: یەکەم لیست بۆ تەوتینکردنی مووچەی مووچەخۆرانی هەرێمی کوردستانمان نارد بۆ بانکی بازرگانیی عێراق (TBI) بۆ ئەوەی لە چوارچێوەی پڕۆسەی هەژماری من تۆمار بکرێن، لیستەکەش ناوی 368 مووچەخۆری تێدایە.

 

وێنە گەورەکە: سەرۆکوەزیران بارزانی خوازیاری پتەوکردنی سیستەمی بەبانکیکردنە لە هەرێمی کوردستان و ئەم هەنگاوەش لە چوارچێوەی 'پڕۆژەی هەژماری من' دەستی پێ کردووە و تا ئێستا  400 هەزار مووچەخۆر تۆمار کراون کە 220هەزاریان کارتیان پێ دراوەتەوە.

 

لە گۆشەیەکی دیکەوە: تیمی هەژماری من بە ئاڤا نیوزی ڕاگەیاندبوو، 25هەزار مووچەخۆر لەو 100 ئامێری پارەڕاکێشانەی (ATM) کە بانکەکانی نێو پڕۆژەی هەژماری من دایانناوە، مووچەی مانگی چوار وەردەگرن.