ئەلمۆنیتەر: لە قەتەرەوە سەرپەرشتیی هێرشەکانی ئەمریکا کراوە

هەواڵ
3 شوبات

شەیری بکە لە:

ئەلمۆنیتەر: لە قەتەرەوە سەرپەرشتیی هێرشەکانی ئەمریکا کراوە

شەوی رابردوو ئەمریکا 85 بنکە و بارەگای گرووپە چەکدارەکانی نزیک لە ئێرانی لە عێراق و سووریا بۆردوومان کرد

ئاڤا دیجیتاڵ

بەپێی هەواڵێکی پێگەی ئەلمۆنیتەری ئەمریکی، لە قەتەرەوە سەرپەرشتی هێرشەکانی ئەمریکا کراوە.

گرنگی هەواڵەکە: هێرشی ئەمریکا بۆ سەر گرووپە چەکدارەکان لە عێراق و سووریا، مەترسی فراوانبوونی گرژیی و ئاڵۆزییەکانی دروستکردووە، ئەمەش دۆخی رۆژهەڵاتی نێوەڕاست دەباتە قۆناغێکی مەترسیدار و، راستەوخۆ کاریگەری لەسەر هەرێمی کوردستان دادەنێت.

وێنە گەورەکە: لە تۆڵەی هێرشە درۆنییەکەی هەفتەی رابردووی سەر بنکەیەکی سەربازیی ئەمریکا لە ئوردن کە کوژرانی سێ سەربازی ئەمریکی لێکەوتەوە، شەوی رابردوو ئەمریکا یەکەم هێرشی دەستپێکرد و 85 بنکە و بارەگای گرووپە چەکدارەکانی نزیک لە ئێرانی لە عێراق و سووریا بۆردوومان کرد.

ئەوەی لەبارەیەوە دەگوترێت: پێگەی (ئەلمۆنیتۆر)ی ئەمریكی بڵاویکردووەتەوە، جەنەڕاڵ ئەلیكس گرینكویچ، فەرماندەی باڵای هێزی ئاسمانیی ئەمریكا لە رۆژهەڵاتی ناوەڕاست، لە ناوەندی ئۆپەراسیۆنە هاوبەشەكانەوە، لە بنكەی عەدیدی ئاسمانی قەتەر سەرپەرشتی هێرشەكانی كردووە.

لێدوانی فەرمی: جەنەڕاڵ ئەلیكس گرینكویچ دوای هێرشەکان رایگەیاند: هێرشەکانمان بەرگریكردینە لە خۆمان.

زیانە سەرەکییەکان: رووانگەی سووری بۆ مافەکانی مرۆڤ دەڵێت 18 چەکدار لە سووریا کوژراون لەگەڵ برینداربوونی ژمارەیەکی دیکە. حەشدی شەعبیش کوژرانی 16 چەکدار و برینداربوونی 25ی دیکەی پشتڕاستکردووەتەوە.

باکگراوند: لەوەتەی جەنگی حەماس و ئیسرائیل لە مانگی 10ی ساڵی رابردوو هەڵگیرساوە، گرووپە چەکدارەکانی نزیک لە ئێران زیاتر لە 165 جار لە عێراق و سووریا و ئوردن هێرشیان کردووەتەوە سەر هێزەکانی ئەمریکا و هاوپەیمانان.

دیارترین هێرش کۆتایی مانگی رابردوو لەلایەن بەرەی مقاوەمەی ئیسلامی کرایە سەر بنکەیەکی سەربازی ئەمریکا لە ئوردن. لە هێرشەکەدا بۆ یەکەمجار کوژرانی سەربازی ئەمریکی لێکەوتەوە، بۆیە کاردانەوەی تووندی ئەمریکای بەدواداهات.