ئەمریکا هۆشداریی بە ئیسرائیل داوە ئێران پەلکێشی شەڕ نەکات

ئاڤا نیوز

ئیدارەی بایدن سەبارەت بە بیرۆکەی "شەڕی سنووردار" لەگەڵ لوبنان هۆشدارییان بە ئیسرائیل داوە، هۆشدارییەكەش ئەوەبووە " ئەو هەنگاوە پاڵ بە ئێرانەوە دەنێت بچێتە ناو شەڕەکەوە". 

وێنە گەورەکە: لە حەوتـی ئۆکتۆبەرەوە بە نزیکەیی هەموو ڕۆژێک ئیسرائیل و حیزبوڵا یەکدی بۆردوومان دەکەن و بەم هۆیەشەوە دەیان کەس لە هەردوولا کوژراون و زیاتر لە 60 هەزار ئیسرائیلیش ئاوارە بوون.

ئەوەی پێویستە بیزانیت: لە چەند هەفتەی ڕابردوودا هێرشەکان زیاتر بوون و ئیسرائیل ڕایگەیاندووە لە ڕێگە شەڕێکی سنووردارەوە ئۆپەراسیۆنێکی بەهێز لە دژی حیزبوڵا لە لوبنان ئەنجام دەدات، بەمەش ئاسایشی سنوورەکان بە دەست دێنێتەوە.

زانیاریی زیاتر: بەرپرسانی ئەمریکا بە ئیسرائیلیان گوتووە "شەڕێکی سنووردار" لە لوبنان یان "شەڕێکی هەرێمیی بچووک" دەبێتە هۆی فراوانبوونی شەڕی غەززە و ئێران پەلکێشی شەڕەکە دەبێت. 

بۆچی گرنگە: هەشت مانگە شەڕی نێوان ئیسرائیل و حەماس دەستپێکردووە، هەوڵە ناوچەیی و نێودەوڵەتییەکان بۆ ئەوەن کە ڕێگە لە فراوانبوونی شەڕەکە بگرن.