شاندی هەرێمی كوردستان لەگەڵ یاریدەدەری وەزیری بەرگریی ئەمریكا كۆبووەوە

ئاڤا دیجیتاڵ

شاندی هەرێمی كوردستان لەگەڵ یاریدەدەری وەزیری بەرگریی ئەمریكا كۆبووەوە، پێشهاتەكانی دۆخی ئەمنیی لەعێراق و هەرێمی كوردستان و بەرەنگاربوونەوەی داعش لەگەڵ دوا هەنگاوەكانی پڕۆسەی چاكسازی لەوەزارەتی پێشمەرگەی هەرێمی كوردستان تاوتوێ كراون.

 بۆچی گرنگە: لە كۆبوونەوەكەدا دوا هەنگاوەكانی پرۆسەی چاكسازی لە وەزارەتی كاروباری پێشمەرگەی حكومەتی هەرێمی كوردستان و یەكخستنەوەی پێشمەرگە، پێشهاتەكانی دۆخی ئەمنی لە عێراق و هەرێمی كوردستان و پێویستیی هەماهەنگیی بەردەوامی ئەمریكا لەگەڵ عێراق و هەرێمی كوردستان بۆ بەرەنگاربوونەوەی ئاڵنگارییە ئەمنییەكان لە چوارچێوەی ڕیككەوتنی ستراتیژیی عێراق ـ ئەمریكادا خرانە بەرباس و بیروڕایان لەبارەیەوە، ئاڵوگۆڕ كرد.

لەلایەكی دیكەوە: شەڕی دژی داعش و ئەگەر و لێكەو‌تەكانی دۆخی ئاڵۆزی ڕۆژهەڵاتی ناوەڕاست و دوا پێشهاتەكانی ناوچەكە بەگشتی، تەوەرێكی دیكەی كۆبوونەوەكە بوو.

ئەوەی پێویستە بیزانیت: فەلاح مستەفا، یاریدەدەری سەرۆكی هەرێمی كوردستان بۆ كاروباری سیاسەتی دەرەوە ، نیاز ساڵح مستەفا بەرپرسی كاروباری دەرەوە و دیپلۆماسی لە سەرۆكایەتیی هەرێمی كوردستان، لە سەردانەكەدا یاوەریی فەوزی هەریری، سەرۆكی دیوانی سەرۆكایەتیی هەرێمی كوردستان دەكەن.