هۆڵەندا پشتیوانیی  كۆتاییهێنان بە ئەركی هاوپەیمانیی نێودەوڵەتی لە عێراق دەكات

ئاڤا دیجیتاڵ

وەزیری دەرەوەی هۆڵەندا، پشتیوانیی وڵاتەكەی دەردەبڕێت بۆ بەردەوامیی دانوستانەكانی نێوان عێراق و هاوپەیمانی نێودەوڵەتیی و كۆتاییهێنان بە ئەركەكەی لە عێراق.

کۆبوونەوەی دووقۆڵی: ئەمڕۆ سێشەممە محەممەد شیاع سوودانی، سەرۆکوەزیرانی عێراق لە بەغدا لەگەڵ هانكی بروێنز سلوت، وەزیری دەرەوەی هۆڵەندا كۆبووەوە.

ڕاگەیێنراوی فەرمی: بەپێی راگەیێنراوی نووسینگەی سەرۆكوەزیرانی عێراق، لە کۆبوونەوەکەدا جەخت لە پێشخستنی پەیوەندییەكان لە بوارە جۆراوجۆرەکاندا لە نێوان عێراق و هۆڵەندا كراوەتەوە:

- سەرۆكوەزیرانی عێراق رژدبوونی حكومەتەكەی دووپاتكردەوە لە هاوكاریكردن لەگەڵ نێردەی ناتۆ لە عێراق كە هۆڵەندا ناوەڕاستی ئەمساڵ سەرۆكایەتیەكەی دەگرێتە دەست.

- سوودانی جەختی لە پەیوەندیی ڕاستەوخۆی بەردەوام لەگەڵ نێردەی ناتۆ كردووەتەوە، كە هاوكاتە لەگەڵ دانوستانەكانی نێوان عێراق و هاوپەیمانیی نێودەوڵەتیی بۆ كۆتاییهێنان بە ئەركی هاوپەیمانێتییەكە. دواتریش هەماهەنگیكردن لە ناتۆ بۆ پێشكەشكردنی  هاوكاری لەبواری مەشق و ڕاهێنان و  ڕاوێژكردن بە هێزە ئەمنییەكانی عێراق.

لەلایەكی دیكەوە: وەزیری دەرەوەی هۆڵەندا ڕایگەیاندووە، پشتیوانی لە بەردەوامیی دانوستانەكانی نێوان عێراق و هاوپەیمانیی نێودەوڵەتیی دەكەن بۆ كۆتاییهێنان بە ئەركی هاوپەیمانیەتییەكە.