ل دهۆكێ پرۆژەیەكێ بەرهەمئینانا كارەبێ ب هێزا ڕۆژێ دێ هێتە دروستکرن

ئاڤا نیوز

بڕیارە ل دهۆكێ پرۆژەیەكێ بەرهەمئینانا كارەبێ ب هێزا ڕۆژێ بهێتە دروستکرن، كارێ پرۆژە ژی دێ ژ لایێ كۆمپانیەكا بریتانی ڤە هێتە کرن.

بۆچی گرنگە: ب دروستکرنا وی پرۆژەی ڕەوشا كارەبێ ل پارێزگەها دهۆکێ باشتر دبیت، دێ 150 مێگاواتان لسەر ڕێژەیا گشتییا بەرهەمئینانا کارەبا وێ پارێزگەهێ زێدە کەت.

داخویانیا فەرمی: هەڤال سەدیق، ڕێڤەبەرێ گشتییێ وەبەرهێنانا پارێزگەها دهۆكێ بۆ ئاڤا نیوز ڕاگەهاند: ئێك ژ پرۆژەیێن ستراتیژی دێ ئەڤسالە ل دهۆكێ مۆلەتێ وەرگریت پرۆژەیەكێ بەرهەمئینانا كارەبێیە ل قەزا سێمێلێ كو ب هێزا ڕۆژێ دێ كارەبێ بەرهەمئینیت، د ناڤبەرا سێمێلێ هەتا سنوورێ زاخۆ دێ كارەب ب هێزا ڕۆژێ هێتە وەرگرتن.

زانیاریێن زێدەتر: كۆمپانیەكا بریتانی دێ كارێ دروستکرنا وی پرۆژەیێ کارەبێ کەت، پرۆژەیێ ناڤبری دێ ب هێزا تیشكا ڕۆژێ بیت و 150 مێگاواتێن كارەبێ بەرهەمئینیت.

ژ لایەکێ دی ڤە: ب پشتەڤانیا حکومەتا هەرێما کوردستانێ، د پلانا ڕێڤەبەریا گشتییا وەبەرهێنانا پارێزگەها دهۆكێ دایە، ئەڤسالە هژمارەک پرۆژەیێن ستراتیژی یێن وەبەرهێنانێ رابگەهینیت، ب تایبەت ل هەردوو قەزایێن ئاكرێ و ئامێدیێ و پشتبەستنەكا زۆر دێ لسەر دەستێ كاری بیت.