لە قەڵادزێ و مەهاباد بوومەلەرزەیەک ڕووی دا

ئاڤا نیوز

 

ئێوارەی ئەمڕۆ بوومەلەرزەیەک بە پلەی 3.3ـی پلەی ڕێختەر لە نێوان شارۆچکەی قەڵادزێی سەر بە ئیدارەی ڕاپەڕین و مەهاباد لە ڕۆژهەڵاتی کوردستان ڕوویدا.

 

وێنە گەورەکە: شارەزایانی بواری بوومەلەرزە دەڵێن، هەرێمی کوردستان ناکەوێتە سەر چەقی هێڵی بوومەلەرزە، ئەو بوومەلەرزانەی ڕوودەدەن لە ئەنجامی خاڵیبوونەوەی وزەی پلێتەکانە. 

 

لێدوانی فەرمی: سیروان ساڵح، شارەزای کەشناسی و بوومەلەرزەزانی بە ئاڤا نیوزی ڕاگەیاند: کاتژمێر 7:31ـی ئەم ئێوارەیە بوومەلەرزەیەک ڕوویداوە و چەقەکەی شارۆچکەی میرئاباد بووە و بەقوڵی هەشت کیلۆمەتر لەژێر زەوی ڕوویداوە، لە قەڵادزێ و مەهاباد هەستی پێکراوە و هیچ مەترسی نەبووە.

 

زانیاریی زیاتر: هەرێمی کوردستان و ڕۆژئاوای کوردستان دەکەونە سەر پلێتی عەرەبی، بەڵام باکووری کوردستان و بەشێکی ڕۆژهەڵاتی کوردستان دەکەونە سەر پلێتی زاگرۆسی، ناوچەی مەڕەش لە باکووری کورستان دەکەوێتە سەر پلێتی ئەنادۆڵ، بە گوتەی سیروان ساڵح ئێستا تەنیا پلێتی زاگرۆسی و ئەنادۆڵ لە جوڵەدان.