قەتەر لە بواری وەرزشیدا هاوکاری یانەی زاخۆ دەکات

ئاڤا نیوز

سەرپەرشتیاری ئیدارەی سەربەخۆی زاخۆ ڕایدەگەیێنێت، لێکتێگەیشتنی باش لە نێوان ئیدارەی سەربەخۆی زاخۆ و قەتەردا هەیە ئەو وڵاتە لە بواری وەرزشیشدا هاوکاری یانەی زاخۆ دەکات.

چیرۆکی سەرەکی: ئەمڕۆ شەممە ئۆفیسی دەستپێشخەری و پەیوەندییەکانی سەرۆکوەزیران بارزانی - OIC، مەراسیمی بەخشینی بڕوانامەی بۆ چوار هەزار و 200 گەنجی نێوخۆ و تاراوگە ڕێکخست کە بەشداریی خولێکی  شەش مانگییان کردبوو. هاوکات بەمەبەستی پەرەپێدانی توانای گەنجانی کوردستان یاداشتێکی لێکتێگەیشتن لەگەڵ  (قەتەر فاوەندەیشن) واژۆ کرا.

لێدوانی فەرمی: گوهدار شێخۆ، سەرپەرشتیاری ئیدارەی سەربەخۆی زاخۆ کە لە مەراسیمەکەدا بەشداربوو، لە چاوپێکەوتنێکدا لەگەڵ ئاڤا نیوز گوتی: "پێویستە گەنجەکان بە بەهرەکانیان خزمەتی وڵات بکەن، ئێمە لەسەر ڕاسپاردەی سەرۆکوەزیران بارزانی پشتیوانی گەنجان دەبین".

لەلایەکی دیکەوە: سەرپەرشتیاری ئیدارەی سەربەخۆی زاخۆ دەڵێت: "لێکتێگەیشتنێکی باش لە نێوان ئیدارەی سەربەخۆی زاخۆ و قەتەر هەیە، زەمینەسازی کراوە بۆ وەبەرهێنان لە زاخۆ لەلایەن قەتەرییەکان، لە بواری وەرزشیشدا هاوکاری یانەی زاخۆ دەکرێت".