هەڵبژاردنی پەرلەمانی كوردستان پێویستی بە زیاتر لە 40 هەزار كارمەندە

ئاڤا نیوز

هەشت ڕۆژ لەبەردەم پڕکردنەوەی فۆڕمی کارمەندانی سەر سندووقەکانی دەنگدان ماوە، کۆمیسیۆن لە هەر چوار بازنەی هەڵبژاردنی  پەرلەمانی کوردستان پێویستی بە زیاتر لە 40 هەزار کارمەند هەیە.

وێنە گەورەکە: بڕیارە ڕۆژی 20-10-2024 هەڵبژاردنی خولی شەشەمی پەرلەمانی کوردستان بکرێت، کۆمیسیۆن ئامادەکارییەکانی چڕکردووەتەوە بۆ سەرپەرشتیکردنی ئەو پڕۆسەیە.

لێدوانی فەرمی: مەڕوان محەممەد، بەرپرسی ئۆفیسی هەولێری کۆمیسیۆنی هەڵبژاردنەکانی عێراق بە ئاڤا نیوزی گوت: "لە دوای دوای تەواو بوونی وادەی پڕکردنەوەی فۆڕمەکە، تیروپشک بۆ ناوەکان دەکرێت و خولی ڕاهێنانی کارمەندەکان دەستپێدەکات".

ئەوەی پێویستە بیزانیت: لە تیروپشكەكە لە 80% ـی پشکەکە بۆ فەرمانبەران دەبێت و 20%یش بۆ دەرچووانی زانكۆ، قوتابیان و ئەوانەی دانەمەزراون دەبێت، ئەو كارمەندانەی كە فەرمانبەری حكومەت نین، 250 هەزار دینار وەردەگرن و ئەوانەیشی فەرمانبەری حكومەتن، بڕی 150 هەزار دینار وەردەگرن لە ڕێگەی فۆڕمەوە دەتوانن داواکاری پێشکەش دەکەن.

ژمارەکان وادەڵێن: کۆمیسیۆن زیاتر لە 40 هەزار کارمەندی بۆ سەر سندووقەکان پێویستە، بەمشێوەیە بەسەر بازنەکاندا دابەش دەبن:-
هەولێر: 15 هەزار کارمەند.
سلێمانی و هەڵەبجە: زیاتر لە 16 هەزار کارمەند.
دهۆک: نۆ هەزار کارمەند.