عێراق بڕیاری دامەزراندنی سێ یەکەمەکانی دەرکرد

ئاڤا نیوز 

 

ئه‌نجوومه‌نی ڕاژه‌ی فیدراڵیی عێراق دامەزراندنی 750 دەرچوو لە سێ یەکەمەکانی زانکۆکان لەسەر میلاکی وەزارەتی خوێندنی باڵا و توێژینەوەی زانستی ڕاگەیاند.

 

وێنە گەورەکە: لەژێر ڕۆشنایی ڕاسپاردەکانی کۆبوونەوەی سێ قۆڵی لە نووسینگەی سەرۆکوەزیرانی عێراق لە ڕێککەوتنی 27-06-2024، ئەنجوومەنی ڕاژە لە 18-07-2024 کۆبوونەوەیەکی خێرای کرد بڕیاری دامەزراندنی یەکەمەکانی دەرکرد.

 

ڕاگەیێنراوی فەرمی: ئەنجوومەنی ڕاژەی عێراق ڕایگەیاند، بڕیار درا بە دامەزراندنی 750 دەرچوو ئەوانەی بڕیارەکە دەیانگرێتەوە، هەفتەی داهاتووش لیستی ناوەکان ڕەوانەی وەزارەتە پەیوەندیدارەکان دەکرێت.

 

زانیاریی زیاتر: ئەنجوومەنەکە دڵنیایی بە هەموو دەرچووە یەکەمەکان و هەڵگری بڕوانامە باڵاکان دەدات دۆسییەکانیان لە ماوەیەکی نزیکدا کۆتایی دێت.

 

ئەوەی پێویستە بیزانیت: بە نووسراوی ژمارە (13001)، لە ڕۆژی 14-07-2024، بە واژۆی وەزیری خوێندنی باڵا، ناوی سێ یەکەمەکانی زانکۆ حکومییەکان کە 12 هەزار و 286 قوتابین، دەرچووی ساڵانی خوێندنی 2017-2018 تاوەکو 2022-2023 ئاراستەی وەزارەتی دارایی و ئابووری هەرێمی کوردستان کراوە، تاوەکو ئەوان بۆ بەغدای بنێرن.